Donald Trump ayaa si rasmi ah loogu doortay in uu noqdo musharaxa xisbiga jamhuuriga ee doorashada soo socoto bisha November ee sanadkan.
Xisbiga oo shir weyne uu ku lahaa magaalada Claveland ee gobolka Ohio ayaa kalsooni buuxda siiyay Trump kaddib markii uu helay taageerada inta ugu badan wafuuddii gobollada ee ka qayb galaysay shirweynaha xisbigaasi.
Ergada gobollada ayaa u codeeysay cidda ay doonayaan in uu xisbiga ku matalo doorashada, waxaana arrintaa ku soo baxay Donald Trump.
Donald Trump ayaa kulankaasi u sheegay in uu ku faraxsan yahay in loo doorto in uu noqdo musharaxa xisbigiisa.
Waxa uu intaasi ku daray in uu kalsooni ku qabo in uu tartanka madaxtinimada dalka ku guuleysan doono isla markaana uu isbadal weyn ka sameyn doono dalka.
Paul Ryan oo ah afhayeenka aqalka wakiillada ayaa ugu baaqay wafuudda ka qayb galaysay shirweynaha xisbiga in loo midoobo sidii loo taageeri lahaa musharaxa Donald Trump.
