Guddoomiyaha Gobolka Banaadir Cumar Maxamuud Maxamed (Cumar Filish) ayaa ka qeyb galay Madal Caafimaad oo ay soo qaban-qaabisay Agaasinka Caafimaadka iyo Daryeelka Bulshada ee Maamulka Gobolka Banaadir iyo Dowlada Hoose ee Xamar.
Madashaan ayaa waxaa kasoo qeyb-galay Madax kala gedisan oo ka kala socday Maamulka Gobolka Banaadir, Wasaaradaha Caafimaadka, Maaliyadda, Dhalinyarada & Isboortiga iyo Ganacsiga. Sidoo kale Madaxda Ururada Takhaatiirta, Daneeyayaasha Caafimaadka, Rugta Ganacsiga, Shirkada Hormuud iyo marti sharaf kale.
Madashaan ayaa waxaa diirada lagu saaray saameynta Caabuqa COVID19 uu ku yeeshay dhaqaalaha iyo arrimaha bulshada dalka Soomaaliya gaar ahaan Gobolka Banaadir, dadaaladii lagu bixiyay Wacyigelinta iyo Waxtarka Talaalka Caabuqa COVID19.
Doodaha Caafimaad iyo Khudbadaha ay Madaxda ka jeediyeen Madasha ayaa hoosta lagaga xariiqay in la joogteeyo Madasha Nuucaan oo kale ah si fikradaha iyo talooyinka wax-tarka u leh Caafimaadka dalka la is weydaarsado si loo helo talooyin lagu horumariyo Caafimaadka dalka.
