Guddoomiyaha Gobolka Gedo ayaa ka hadlay wada xaajood ku saabsan muran ka dhashay Derbiga ay Dowladda Kenya ka dhisayso inta u dhexeysa Magaalooyinka Balad Xaawo iyo Mandheera Kenya.
Guddoomiyaha Gedo Maxamed Muxumad Maxamed oo lahadlay SONNA, ayaa sharraxaad ka bixiyay kulan gaar ah oo dhex maray wafdi ka socda Maamulka Gedo iyo maamulka Mandheera Kenya iyo sidii loo hirgelin lahaa wada hadalkii dhex maray Labada Madaxweyne Maxamed C/laahi Farmaajo iyo Uhuru Kenyatta.
Mudane Maxamed ayaa sidoo kale sheegay inaysan kala maarmi karin Labada Shacab ee Soomaaliyeed, maaddaama uu ka dhexeeyo Dhul daaqsimeed, Ganacsi iyo wax wada qaybsi fara badan, wada hadalladuna ay sii socon doonaan si loo gaaro xal kama dambays ah oo ku aaddan kala xirista Labada Shacab ee Walaalaha ah, wuxuuna intaa raaciyay inay arrinta ugu dambaynayaan Dowladda dhexe.
“Dedaalkaas Boqolkiiba Sagaashan waxaa geliyay Dowladda dhexe ee uu hoggaaminayo Maxamed C/laahi Farmaajo, marka Insha Allaahu dowladda unbaannu kaga war sugaynaa, heshiiska iyo wada hadalka waxaa metesha Dowladda dhexe, iyadaana waqtiga siinaynaa” ayuu yiri Guddoomiyuhu.
Guddoomiyaha ayaa dhanka kale sheegay inay ku guda jiraan dejinta xiisadda ka dhalatay Derbiga iyo halka laga dhisayo, isagoo intaa raaciyay inay wadaan baaritaanno ku aaddan sidii loo hubin lahaa wararka sheegaya in lagu soo xad gudbay Ciidda Soomaaliyeed.
Hadalkan ayaa imanaya iyadoo Maalintii Shalay ay halkaasi gaareen Wafdi uu hoggaaminayo Wasiirka arrimaha gudaha ee maamulka Jubbaland C/rashiid Xasan C/nuur ( Janan), iyagoo wada hadal ku saabsan xallinta xiisaddani la yeeshay madaxda Magaalada Mandheera ee Gobolka Waqooyi Bari Kenya.
