Dowladda hoose ee Xamar ayaa olole nadaafadeed oo qashinka iyo carrada looga qaadayay wadada Buundoonyinka ka sameysay isgoyska Ceel-gaabta ee magaalada Muqdisho.
Wadadaan oo ay fadhiisatay carro aad u badan ayaa waxaa ololahaan ka sameeyay shaqaalaha nadaafadda dowladda hoose ee Xamar oo uu horkacayay agaasimaha cusub ee nadaafadda iyo bilic soo celinta Gobolka Banaadir.
Agaasimaha guud ee nadaafadda iyo bilic soo celinta dowladda hoose ee Xamar mudane, Sharmaake Caddow ayaa sheegay in ololahan uu bilow u yahay sidii bilicda Caasimadda dib loogu soo celi lahaa,isagoo bulshada ku nool gobolka Banaadir ka codsaday in ay la shaqeeyaan si ay ula tartamaan Caasimadaha caalamka.
Waaxda nadaafadda iyo bilic soo celinta dowladda hoose ayaa ku howlan sidii loo dardar geli lahaa ololaha nadaafadeed, si bulshada ku nool Caasimadda ay u helaan deegaan nadiif ah iyo caafimaad maadaama nadaafadu ay qeyb muhiim ah uga jirto caafimaadka.
