Xukuumadda Soomaaliya ayaa si xooggan u cambaareysay weerarkii argagixisonimo ee saaka ka dhacay magaalada Kismayo, kaas oo ay ku dhinteen askar iyo dad rayid ah.
Wasiirka Wasaaradda Warfaafinta,Dhaqanka iyo Dalxiiska dowladda Soomaaliya Mudane Maxamed Cabdi Xayir Maareeye ayaa yiri “ Weerarka argagixisonimo waxa uu saaka ka dhacay goob ay askari tababar ku qaadanayeen oo ku taalla Kismaayo, waxaana fuliyay qof nafti hallige ah oo argagixisada Shabaab ka tirsan”
Qaraxa oo loo adeegsaday gaari walxaha qarxa laga soo buuxiyay,waxa uu sababay dhimashada dhowr askari iyo dad rayid ah oo goobta ka dhowaa. Wasiir Maareeye, ayaa tacsi u diray eheladii dadkii ku ku geeryooday weerarkan argagixiso, waxa uuna caafimaad deg deg ah u rajeeyay dadkii ku dhaawacmay.
“Waa Fal kale oo kooxda argagixisada ah ee laga itaalka roonaaday ku dooneyso in ay ku muujiso jiritaankeeda, laakiin dowladda iyo shacabka Soomaaliyeedba waxaa ka go’an in ay sii wadaan la dagaallanka argagixisada Alshabaab, ilaa laga sifeeyo geyiga Soomaaliya iyo gobolkaba” Sidaas waxaa yiri Wasiirka Warfaafinta,Dhaqanka iyo Daxiiska Soomaaliya Mudane Maxamed Cabdi Xayir Maareeye.
Wasiirka ayaa intaa ku daray “Weerarka kooxdu ku qaadday xaruntan askarta lagu tababaro waxa ay uga gol leedahay in ay wiiqdo dadaallada lagu dhisayo ciidan qaran oo xoog leh, balse taasi uma suurto geli doonto,dowladda iyo maamullada gobollada oo isku duubanna waxay sii wadi doonaan dadaallada dhismaha iyo isku dhafka ciidammo qaran, oo awood u leh in ay dalka ka difaacaan cadow kasta oo ay argagixisadu ugu horreyso”
