RADIO MUQDISHO:-Ra’iisul Wasaaraha Xukuumadda Federaalka Soomaaliya Mudane Xamsa Cabdi Barre, ayaa si gaar ah ugu hambalyeeyay saddexda arday ee kaalmaha hore ka galay Imtixaanka shahaadiga ah ee dugsiyada sare, kaas oo sanadkan ay u fariisteen 42,916 arday,isagoo kula hadlay khadka telefoonka.
Ra’iisul Wasaaraha ayaa bogaadiyay dadaalka iyo guusha ardayda, isagoo sheegay in Dowladda Federaalka Soomaaliya ay damaanad qaadday waxbarashadooda jaamacadeed ee heerka koowaad.
“Waxaan maanta taleefoonka ugu hambalyeeyay seddexdii arday ee kaalmaha hore ka galay intixaamka qaran ee dugsiyada sare.
Waxaan u rajeeyay guul mustaqbal ,aniga oo u xaqiijiyay in dowladda federaalka ah ay damaanad qaadayso waxbarashadooda jaamacadeed ee heerka koowaad.
Waxaan sidoo kale hambalyo u direy dhammaan ardaydii ku baastay intixaamka, waalidiintooda iyo macalimiintooda.”ayaa uu yidhi Ra’iisul Wasaare Xamse.
