Wafdi uu hogaaminayo Wasiirka Gargaarka ayaa maanta deeq dawo ah gaarsiisay isbitaalka Dhooleey ee Gobolka Jubbada Hoose, halkaasi oo ay ku nool yihiin qoysas uu saameeyay fatahaado halkaasi ku dhuftay.
Wafiga ayaa garoonka waxaa ku soo dhaweeyay mas’uuliyiin ka tirsan maamulka Degmada, iyadoo soo dhaweyn kaddib u kuurgalay xaaladda dhabta ah ee ka jirta Degmada.
Xildhibaan Xasan Cabdi Ismaaciil oo ka tirsan Golaha Shacab lagana soo doortay deegaanada Jubbaland oo la hadlay Radio Muqdisho ayaa sheegay in daadad ka dhashay roob mahiigaan ah uu saameyn xoogan ku yeeshey bulshada ku nool Gobolka Jubbada Hoose.
“Wafdi uu hogaaminayo Wasiirka Gargaarka iyo xubno ka socady Xafiiska Ra’iisul Wasaaraha oo aan qeyb ka ahaa ayaan kormeer ku tegnay Degmada Dhoobley, waxaana soo booqanay meelaha ay dadka barakacayaasha deganyihiin, kormeer kaddib waxaan wadnay daawo lix tan ah oo aan ugu talagalnay Isbitaalka, runtii dad ay saameysay fatahaada ayaa halkan ku nool”ayuu yiri Xildhibaan Cabdi Ismaaciil.
Wasiirka Gargaarka iyo Maareynta Musiibooyinka ee Xukuumadda Federaalka Soomaaliya Mudane Xamsa Saciid Xamsa oo ah Guddoomiyaha Guddiga Gurmadka Qaranka ayaa sheegay in hay’adaha gargaarku dhaqso uga howl geli doonaan Dhoobley, si gurmad balaaran loo gaarsiiyo bulshada ku dhibaateysan Dhoobleey.
“Waan idinka soo daahnay, wixii soo daaho ayaa kheyr ku jira, maanta ayaan go’aansanay inan idin soo gaarno., waxbaan ka qaban doonaa hay’adaha halkan ka maqan inay si deg deg ah u soo noqdaan, Waxbarashada Caafimaadka inaad heli doontaan ayaan rajeynayaa” ayuu yiri Wasiirka Gargaarka.
