Munaasabadda wareejinta gaadiidka, agabka ciidamada iyo tasiilaadka caafimaadka oo lagu qabtay Dugsiga Tababarka Ciidamada ee Dhego badan ayaa waxaa ka soo qeyb galay Wasiiru-dowlaha Wasaaradda Gaashaandhigga XFS, Ku-xigeenka Agaasimaha Midowga Yurub ee Qaaradda Afrika, Ergayga Midowga Yurub u qaabilsan Soomaaliya, saraakiil ka socotay xafiiska UNOPS iyo mas’uuliyiin kale.
Wasiiru-dowlaha Wasaaradda Gaashaabdhigga XFS Cumar Cali Cabdi oo Midowga Yurub kala wareegay agabka ayaa ka mahadceliyey taageerada Midowga Yurub isagoo xusay inay tahay talaabo muhiim ah.
Shir jaraa’id oo ay labada mas’uul si wadajir ah u wada qabteen ayaa waxaa ugu horeyn ka hadlay Mathieu Briens, Agaasime ku-xigeenka Midowga Yurub ee Qaaradda Afrika Mathieu Breins kaasi oo sheegay inuu ku faraxsanahay inuu maanta la joogo Wasiiru-dowlaha difaaca Soomaaliya iyo dhammaan bahda Midowga Yurub si ay ugu wareejiyaan gaadiid iyo agab militari oo muhiim u ah Soomaaliya,.
“Qalabkani wuxuu ka mid yahay taageerada weyn ee Midowga Yurub uu siinayay Soomaaliya sanadihii la soo dhaafay oo ay ka mid tahay tababarka Ciidamada aan siinay toban kun oo askari laga soo billaabo 2010-kii waxaana ay saldhig u tahay si aan u garab istaagno Soomaaliya si ay u gaarto hamigeeda”,
Wasiiru-dowlaha Gaashaandhigga XFS Cumar Cali Cabdi oo ka mahadceliyay taageerada Midowga Yurub gaar ahaan gaadiidka iyo agabka lagu wareejiyay ayaa sheegay inu Midowga Yurub uu yahay saaxiib weyn oo ka mid ah taageerayaasha beesha caalamka.
Ugu dambeyntii Wasiiru-dowlaha Wasaaradda Gaashaandhigga XFS oo ay wehliyaan saraakiisha Midowga Yurub ayaa kormeeray fasalada ay ka socdaan koorsooyinka tababarada kala duwan ee saraakiisha CXD ay ku qaataan dugsiga Tababarka Jeneraal Dhego badan.
Dugsiga tababarka Jeneraal Dhaga badan ayaa waxaa lagu soo kordhiyay dhismeyaal iyo fasalo cusub oo ay dhiseen Midowga Yurub si loogu tababaro ciidamada Qaranka Soomaaliya.
