Madaxweynaha Dawlad goboleedka Puntland Dr. Cabdiweli Maxamed Cali Gaas oo maanta ka qeyb galay xafladd xilka loogu wareejinayey Gudoonka cusub ee Rugta Ganacsiga iyo Warshadaha Puntland ayaa ku booriyay in ay horumariyaan ganacsiga deegaannada Maamulka Puntland.
Munaasabad kooban oo lagu qabtay xarunta Jaamacadda Bariga Afrika ee magaalada Garoowe waxaa kaloo ka qeyb galay Madaxweyne ku xigeenka Puntland Cabdixakiim Cabdulaahi Xaaji Cumar Camey, Wasiiro, Xildhibaano katirsan Golaha wakiilada Maamulka Puntland, Ganacsato, Isimo , Waxgarad, culimo’udiin iyo marti sharaf kala duwan.
Dr.Cabdiweli Maxamed Cali Gaas ayaa u hambalyeeyey maamulka cusub ee Rugta Ganacsiga iyo Warshadaha Puntland, isagoo ku booriyey in ay dadaal dheer u galaan sidii loo horumarin lahaa guud ahaan Ganacsiga deegaannada Puntland.
“Waxaanu u baahanahay inaanu isbadalno, adduunku maanta meesha uu marayo iyo waxa aan konton sano kahor aynu samaynjirnay inaan weli suubinayno isma qabanayso, horumarka aanu rabnana magaarayno, marka halagu dadaalo horumarinta ganacsiga” ayuu yiri Dr Gaas.
Madaxweynaha Maamulka Puntland ayaa ganacsatada ka dalbaday in ay la jaan qaadaan ganacsatada adduunka, waxaana uu tusaale u soo qaatay jidadka wadamada horumaray in ay dhisaan shirkado ay leeyihiin ganacsato, iyagoo aan wax mashruuca ku qaadan, balse markii ay dhameeyaan ay dib lacagta ka gashay uga qaadaan gawaarida isticmaasha waddooyinkaasi.
“Culimadu nagu diidi maayaane sakada aad sanadka bixisaan dawladda ku taageera, bal aan tijaabino halsano sakadeed aan garoon diyaradeed keliya ku dhisano, maxaa inoo diidaya mise cid gaar ah ayaa la siiya sakada” ayuu hadalka raaciyey Dr Gaas.
Cabdiweli Maxamed Cali Gaas ayaa ugu dambeyn Ganacsatada Puntland ugu baaqay in ay ka qeyb qaataan dagaalka adag ee ay kula jiraan burcad diimeedka Ururka Al-Shabaab, kuwaasi oo guulo waaweyn ay ka soo hoyeen ciidanka Puntland.
