Saraakiil Soomaali iyo Mareykanka ayaa xaqiijiyay in howlgalkii dhowaan lagu beegsaday maleeshiyaadka kooxda Alshabab ay si wadajir ah u fuliyeen ciidanka xooga dalka gaar ahaan kuwo Komandos ee Danab oo ay kaabayeen diyaaradaha qumaatiga u kaca ee Helocpter-ka.
Howlgalkaasi oo xilli habeen ah dhacay ayaa sida la sheegay waxaa lagu diley horjoogiyaal ka tirsan Al-shabaab iyo maleeshiyaad kale.
Afhayeenka xukuumadda Soomaaliya C/salaam Caato, oo la hadley telefishinka CNN ayaa xaqiijiyay in howlgalkaasi ay ka qeybg qaateen ciidanka Soomaaliya isla markaana sidii loogu talagalay u dhacay lagana gaaray hadafkii laga lahaa.
Sidoo kale nin u hadlay howlgalka dowladda Mareykanka ee qaarada Afrika ayaa dhankiisa sheegay in diyaaradaha Emerikaanka ay qeyb ka qaateen howlgalkaasi isla markaana ay kaabayeen ciidanka Komandoska Soomaaliya.
Dhinaca kale xukuumadda Washington ayaa faah faahin dheeraad ah ka bixisay weerarkii Sabtidii la soo dhaafay ay ka fulisay deegaanka Raaso ee gobolka Hiiraan.
Warka ka soo baxay Mareykanka ayaa lagu sheegay in horjooge lagu magacaabo Yuusuf Cali Ugaas, oo kooxda Alshabab u qaabilsan tababarada maleeshiyaadka iyo barabugaandada lagu khaariyay weerarkaasi, iyadoo sidoo kale ragga howlgalkaasi lagu diley uu kamid ahaa horjooge kale oo magaciisa lagu sheegay Maxamed Mire oo dhanka maaliyadda kooxda u qaabilsan.
Weerarkaasi ayaa lagu laayay horjoogiyaal sar sare iyo maleeshiyaad kale oo aad u badan kuwaas oo la sheegay in ay isku diyaarinayeen in ay weerar ku qaadaan fadhiisamada ciidanka midowga Afrika ee AMISOM iyo kuwa Soomaaliya.
