Faahfaahino dheeraad ah ayaa laga helayaa khasaaraha ka dhashay qaraxyo maanta ka dhacay magaalada Kambala ee caasimadda dalka Uganda, ilaa lix qof ayaa la xaqiijiyey inay ku dhinteen, 33 kalena ay ku dhaawacmeen, ugu yaraan laba qarax oo 10:00 am barqanimo ee Talaadadii maanta ka dhacay Kampala.
Booliska ayaa qabtay shir jaraa’id oo faahfaahin kooban looga bixiyey khasaaraha iyo cida ka dambeysay weeraradaan, seddax kamid ah dadka ku dhintay qaraxyada waxay ahaayeen kooxihii qaraxa fuliyay, sida uu warbaahinta u sheegay Fred Enanga oo ah Afhayeenka u hadlay booliska Uganda.
Afhayeenku waxa uu sheegay in xogaha sirdoon ee la helay ay muujinayaan in qaraxa ay ka dambeeyeen maleeshiyaadka maxalliga ah oo lagu magacaabo ADF ee fadhigeedu yahay Jamhuuriyadda Dimoquraadiga ee Congo.
Waxaa la soo bandhigay muuqaallo ay duubeen kaamiradaha CCTV-ga oo muujinaya qaabka loo fuliyey mid ka mid ah qaraxyadaas.
Fred Enanga oo u hadlay booliska Uganda waxuu intaas ku sii daray in 33 qof ay ku dhaawacmeen weerarka, 5 kamid ah dadkaas ayaa la il daran dhawaacyadii ka soo gaaray qaraxyadaan oo ah kuwo culus.
Afhayeenka ayaa sidoo kale sheegay in qof kale oo kamid ahaa kooxihii qaraxa ka dambeeyay ay qabteen laamaha ammaanka, isla markaana gurigiisa laga helay jakadaha qarxa.
Illa hadda kooxda ADF ma sheegan mas’uuliyadda weerarradaan, balse waxaa la xasuustaa inay dusha u riteen mas’uuliyadda qaraxyo sidaan oo kale bishii hore uga dhacay Kampala, kuwaas oo galaaftay nolosha ugu yaraan laba qof.
