Galmudug oo deegaanka Saaxa-wanaag ka dhagax dhigtay Dugsi Hoose iyo Dhexe

Kormeerkaan oo ujeedkiisu ahaa u kuurgelida baahiyaha Waxbarasho ee ka jira deegaanada Gobolka Mudug qaarkood iyo sidii bulshada loogu wacyigelin lahaa Waxbarida Carruurtooda ayaa waxaa mas’uuliyiin ka tirsan Wasaaradda Waxbarashada,Hidaha iyo Tacliinta sare ee maamulka Galmudug ay ku tageen deegaanka Saaxa-wanaag oo ka mid ah deegaanka dhanka Galbeed kaga beegan magaalada Gaalkacyo ee xarunta Gobolka Mudug.

Mas’uuliyiintaan ayaa intii ay halkaasi ku sugnaayeen waxay indha idheyn ku sameeyeen goobaha Waxbarashada gaar ahaan Dugsiyada lagu barto Qur’aanka Kariimka ah.

Kormeerka ka dib ayaa waxaaa mas’uuliyiinta ka socotay Wasaaradda Waxbarashada,Hidaha iyo Tacliinta sare ee Maamulka Galmudug oo uu hogaaminayo Wasiiru Dowlaha Wasaaradda Waxbarashada Galmudug Burhaan Warsame Cigaal kullan xog wareysi ah la qaateen Bulshada ku nool deegaanka Saaxa-wanaag ee ka tirsan Gobolka Mudug.

Wasiiru Dowlaha Wasaaradda Waxbarashada Maamulka Galmudug Burhaan Warsame Cigaal ayaa Bulshada ay la kulmeen uga warbixiyay ujeedka booqashadooda,isagoona sheegay in marka hore ay ku faraxsan yihiin iney soo booqdaan deegaanka Saaxa-wanaag hadana ay Bulshada kala kulmaan soo dhoweyn diiran.

Wuxuuna tilmaamay inta ay ku guda jireen kormeerkooda ay arkeen in baahi weyn oo dhanka Waxbarashada ay ka jirto deegaanka Saaxa-wanaagsan,taasi oo u baahan in si deg deg ah looga jawaabo loona hirgeliyo Bulshada goobo waxbarasho si loo kobciyo maskaxda jiilka deegaankaasi.

Ugu danbeyntii,Wasiiru Dowlaha Waxbarashada,Hidaha iyo Tacliinta sare ee Galmudug iyo mas’uuliyiintii ku wehlineysay booqashada waxay si rasmi ah u dhagax dhigeen xarun Dugsi hoose iyo dhexe oo lagu wado in deegaanka Saaxa-wanaag laga hirgeliyo Mustaqbalka dhow.