Maamulka gobolka Shabeellada Dhexe, ayaa sheegay in ay billaabeen ololaha dalkaaga dhiso, iyadoo dayactir lagu billaabay waddooyin ka mid ah degmada Jowhar ee gobolka Shabeellada Dhexe.
Waddadaan dayactirka lagu wado ayaa isku xirta degmada Jowhar ee gobolka shabellaha dhexe iyo deegaanka Kongo, taasoo Burbursaneyd kaddib markii uu ku soo fatahay wabiga shabeelle, iyadoo howshaas ay iska kaashanayaan maamulka gobolka iyo qaar ka mid ah jaaliyadda Soomaaliyeed ee ka soo jeedda gobolkaas.
Guddoomiyaha Gobolka shabeellaha Dhexe Cali Cabdullaahi Xuseen Guudlaawe ayaa u mahadceliyay dhammaan dadka ka qayb qaadanaya howshaan waxa uuna yiri “Fatahaadaha Gobolka shabeellaha dhexe way ku soo noq-noqdeen walow Taxadar dheeraad ah la muujiyay ,waxaan taagannahay inaan dayactir ku samaynno goobahaas oo uu saameeyay wabiga shabeelle, waxaan aad ugu mahadcelinayaa dhammaan dadka ku nool gobolka shabeellaha dhexe ka qaybqaadashadooda arrintaan”.
Dhawaan ayey ahayd markii wabiga shabeelle uu ku fatahay deegaanno badan oo ku teetsan wabiga taas oo dhalisay burburka waddooyinka qaar iyadoo hadda maamulka gobolka iyo dadka ku nool gobolka shabeellaha dhexe ay isku taageen inay waddooyinkooda dhistaan.
