Munaasabad lagu guddoonsiinayay shahaadooyin Dr C/risaaq Axmed Dalmar iyo Dr Cismaan Maxamuud Dufle oo adeeg caafimaad u sameeyay Abwaan C/llaahi Ciise Singub ayaa lagu qabtay magaalada Muqdisho, iyadoo munaasabadaasi ay soo abaabuleen Golaha Abwaanada Soomaaliyeed.
Munaasabadda ayaa dadkii ka hadlay waxa ay bogaadiyeen sida bulshada Soomaaliyeed ay u qidmeynayaan dhaqaatiirtaasi, iyagoo ku ammaanay adeegyada Caafimaad ee Muhiimka ah oo had iyo jeer ay la garab taaganyihiin umadda Soomaaliyeed.
Dr Cismaan Maxamuud Dufle oo munaasabadda hadal ka jeediyay ayaa sheegay juhdi dheer in ay u galeen in ay la tacaalaan xaaladda Caafimaad ee Abwaan Singub ayna ku guuleysteen, waxaana uu xusay markii ay maqleen in uu xanuunsanyahay Abwaanka wel wel badan ay ku abuurantay laakiin qadarta eebe darteed uu ku guuleeyay, baaritaano cudurada guud ahna uu ku sameeyay.
Dr C/risaaq Axmed Dalmar oo ah dhaqtarka abwaanka u daweeyay indhaha oo isna hadlay ayaa sheegay in mar walbo ay garabtaaganyihiin dadka waxgalka u ah bulshada, waxaana uu xusay in albaabadooda ay u furanyihiin abwaanada,fanaaniinta, iyo cid kasta oo bulshada wax gal u ah.
Ugu dambeyn Abawaan C/llaahi Ciise Singub ayaa shahaadooyin guddoonsiiyay labada dhaqtar ee ku kala taqasusay daweynta Indhaha iyo Cudurada guud Dr C/risaaq Axmed Dalmar iyo Dr Cismaan Maxamuud Dufle, isagoo ku ammaanay dadaalka ay u galeen xaaladiisa Caafimaad.
