Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabdullaahi oo ay wehliyaan ku xigeennadiisa, ayaa maanta shir guddoomiyay kalfadhiga Saddexaad kulankiisa 4-aad oo ajandihiisu ahaa dhagaysiga warbixinta Guddiga arrimaha Gudaha Aqalka Sare.
Guddoomiyaha Guddiga arrimaha Gudaha Aqalka Sare Sanatar Deeqa Xasan Xuseen, ayaa ugu horrayn xubnaha Golaha la wadaagtay warbixintooda ku saabsan is-barbardhigga noocyada Federaalka, wadamada isticmaala, sababaha loo isticmaalo iyo muhiimaddiisa.
Intaas kadib Sanatarrada Aqalka Sare ayaa gudagalay dooda aragtidooda ku saabsan warbixinta Guddiga arrimaha Gudaha, iyaga oo soo bandhigay fikirkooda arrimaha Federaalka, kan ku habboon Soomaaliya iyo tallo iyo tusaalooyin kale oo muhiim ahaa.
Guddoomiye Cabdi Xaashi oo kulanka soo xiray, ayaa Sanatarrada iyo guddiga arrimaha gudaha uga mahad celiyay warbixinta iyo dooda miisaanka lahayd ee ay maanta Golu ka yeesheen arrimaha Federaalka, wuxuuna sheegay in la sii ambaqaado cilmi baarista arrimaha Federaalka, lana aruuriyo aragtida iyo talada Sanatarrada ay maanta dhiibteen, si loola wadaago Guddiyada qabyo qoraalka Dastuurka KMG ah gacanta ku haaya.
