Madaxweynaha dowlad goboleedka Galmudug Axmed Cabdi Kaariye (Qoor Qoor) ayaa maanta guddoomiyay shirka golaha Wasiirrada oo uu goobjoog ka ahaa Madaxweyne ku-xigeenka Galmudug Cali Daahir Ciid.
Ugu horreyn Madaxweynaha Galmudug ayaa warbixin ka siiyay golaha Wasiirrada heshiiskii Madasha Wadatashiga Qaran, iyadoo fadhiyada soo socda go’aan laga gaari doono, sida lagu sheegay qoraal ay Madaxtooyada Galmudug ka soo saartay shirka.
Sidoo kale Wasiirka arrimaha gudaha iyo dib u heshiisinta Galmudug ayaa golaha hor keenay xeerka dhulka Galmudug iyo warbixinta laba degmo. Sidoo kale Wasaaradda Amniga ayaa warbixin ka siisay golaha halka uu marayo wajiga labaad ee dagaalka ka dhanka Khawaarijta Al-Shabaab.
Ugu dambeyn Madaxweynaha Galmudug Axmed Cabdi Kaariye ayaa golaha faray in la dardar galiyo howlaha shaqo ee Xukuumadda oo ay ka mid yihiin dagaalka ka dhanka ah argagixisada iyo doorashooyinka qof iyo codka ah ee dhawaan billaaban doona.
