Guddoomiyaha guddiga dib u hishiisiinta Qaranka Ismaaciil Macalin Muuse oo la hadlay warbaahinta Qaranka ayaa ugu baaqay dadka Soomaaliyeed in ay ka shaqeeyaan nabadda islamarkaana ay ka digtoonaadaan wax kasta oo abuuri kara xasilooni daro.
Guddoomiyaha guddiga dib u hishiisiinta Qaranka oo sii hadlay ayaa si gaar ah uga hadlay dagaalada dhawaan ka kala dhacay gobolada Hiiraan iyo Galgaduud oo uu sheegay in xiligani aan loo baahneyn in dagaalo uu dhex maro dad Soomaaliyeed sidaasi daraadeed waxa uu ku baaqay in si shuruud la’aan ah loo joojiyo dagaalada ku saleysan beelaha.
Ismaaciil Macalin Muuse ayaa dhinaca kale ka hadlay waxqabadka guddiga ee sanadkii tagay oo uu sheegay in guddiga dadaalo badan uu ku bixiyay sidii loo joojin lahaa colaado ka dhacay qaar ka mid ah gobolada dalka, sida Sh/hoose, iyo Hiiraan oo uu tilmaamay in ay ku guuleystaan joojinta colaadahaasi dhacayay waagaa.
Guddiga dib u hishiisiinta Qaranka ayaa dadaal badan ku bixiyay joojinta marka colaado ay dhex maraan beelo walaala ah oo wada daga.
