Guddiga Gurmadka Qaran ayaa maanta shir ku yeeshay magaalada Muqdisho, iyagoo ka arrinsaday xoojinta adeegyada gurmadka degdegga ah iyo u diyaar-garowga xaaladaha musiibo ee ka dhici kara dalka.
Shirkan, oo ka dhacay xarunta Haydda SoDMA, waxaa shir guddoomiyay Wasiirka Wasaaradda Caafimaadka ahna Guddoomiyaha Guddiga Gurmadka Qaran, Dr. Cali Xaaji Aadan, waxaana ka qeyb galay xubno ka tirsan Golaha Wasiirrada, Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle, iyo wakiillo ka socday ururrada bulshada rayidka ah.
Intii uu socday kulanka, guddigu waxay xoogga saareen kor u qaadista tayada adeegyada caafimaad ee xarumaha gurmadka degdegga ah, iyadoo sidoo kale la dardargelinayo qalabeyntooda si ay uga jawaabaan xaaladaha degdegga ah. Waxa kale oo la adkeeyay baahida loo qabo diyaar-garowga looga hortagayo musiibooyinka soo noqnoqda ee saameeya dalka.
Sidoo kale, guddigu waxay ka doodeen baahida loo qabo in la sameeyo dadaallo dhaqaale ururin bulsho ah oo loo maro iskaashi u dhexeeya dowladda, ganacsatada, iyo shacabka, si loo taageero hay’adaha gurmadka si ay si wax ku ool ah uga falceliyaan xaaladaha degdegga ah.
Guddoomiyaha guddiga, Dr. Cali Xaaji Aadan, ayaa sheegay in shirka uu qayb ka yahay dadaallada lagu xoojinayo awoodda gurmadka ee dalka, isla markaana laga fogaanayo jawaab celin daahsan marka ay dhacaan musiibooyin.
Kulankan ayaa imaanaya xilli qeybo kamid ah dalka ay wajahayaan xaalado adag oo bini’aadantinimo, kuwaas oo u baahan is-kaashi iyo u diyaar-garow mideysan.
