Guddiga Kheyraadka Dabiiciga iyo Bii’ada ee Golaha Shacabka Baarlamaanka Jamhuuriyadda Federaalka Soomaaliya ayaa xafiiskiisa xarunta Guddoonka iyo Guddiyada ee Villa Hargeysa kulan su’aalo weydiin iyo la xisaabtan ah kula qaatay Wasiirka Wasaaradda Batroolka iyo Macdanta ee Xukuumadda Federaalka Soomaaliya Mudane Cabdirisaaq Cumar Maxamed oo ay wehliyaan Wasiir Ku-xigeenka Wasaaradda iyo Agaasimaha hay’adda Batroolka, waxaana kulanka shir guddoominayay Guddoomiyaha Guddiga Xildhibaan Yuusuf Xuseen Axmed Gamaadiid.
Ugu horeyn Wasiirka Batroolka ee Xukuumadda Federaalka Soomaaliya Mudane Cabdirisaaq Cumar Maxamed ayaa guddiga uga warbixiyay waxyaabihii u qabsoomay iyo qorshayaasha u degsan.
Intaasi ka dib xubnaha guddiga ayaa Wasiirka iyo mas’uuliyiinta kale ee la socotay weydiiyay su’aalo xiriira shaqooyinka ay Wasaaradda dalka iyo dadka u heyso gaar ahaan howlaha shidaal qodista iyo sidoo kale halka ay marayaan, waxaana dhinaca kale Wasiirka uu ka jawaabay su’aalaha guddiga uu weydiinayay.
Ugu dambeyn Guddoomiyaha Guddiga Xildhibaan Yuusuf Xuseen Axmed Gamaadiid oo kulanka soo xiray ayaa Wasiirka iyo xubnaha kale ee la socday uga mahadceliyay sida ay uga soo jawaabeen u yeeritaanka guddiga.
