Madaxda Wasaaradda Qorsheynta, Maalgashiga iyo Horumarinta Dhaqaalaha Xukuumadda Federaalka Soomaaliya ayaa manta magaalada Muqdisho kullan kula yeeshay Guddiga Maaliyadda, Miisaaniyadda, Qorshaynta iyo la-xisaabtanka Hay’addaha Dowladda ee Golaha Shacabka Baarlamaanka Federaalka Soomaaliya.
Kulankan waxaa ka qeybgalay Wasiirka Wasaaradda Qorsheynta Mudane Maxamuud Cali Sheekh Faarax (Beenebeene) oo uu wehliyo Wasiir ku xigeenka Wasaaradda Mudane Maxamed Cabdulqaadir Cali, Agaasimyaha Guud ee Wasaaradda Mudane Asad Yuusuf Qanyare, Guddoomiyaha Guddiga Maaliyadda, Miisaaniyadda, Qorshaynta iyo La- Xisaabtanka Hay’adaha Dowladda ee Golaha Shacabka Xil. Maxamed Faarax Nuux, dhammaan Guddiga iyo Agaasimyaasha waaxyaha iyo La-taliyaasha Wasaaradda Qorsheynta.
Kulanku inta uu socday, waxey labada dhinac isla lafo-guray arrimaha mudnaanta u leh dalkeenna oo ay ugu horeyso Miisaaniyadda dalka oo ay Wasaaradda qeyb lixaad leh ku leedahay diyaarinteeda. Sidoo kale, Sharciga Hay’adaha aan Dowliga ahayn oo ay diyaarisay Wasaaradda iyo dar-dargelintiisa geedi socodka horumarineed ee dalka.
Wasiirka Wasaaradda Qorsheynta Maxamuud Cali Sheekh Faarax (Beenebeene) ayaa sharaxay ahmiyadda kullanka uu daaran yahay.
“Guddiga Miisaaniyada, Qorsheynta iyo La-xisaabtanka Hay’addaha ee Golaha Shacabka waxa uu muhiimad gaar ah u leeyahay umadda Soomaaliyeed, ka Wasaaradd ahaan macno wayn ayuu noo leedahay inaa ka wada shaqeeyno sharicyadda ay horey Wasaaradda u soo diyaarisay oo Baarlamaanka horyaala oo uu ugu horeyo; Sharciga Hay’adaha dowliga aan ahayn (NGO Bill). Wasaaradda Qorsheynta, waxaa ka go’an inaa si dhow uga wada shaqeeyno howlaha baaxada leh ee na horyaalo, ka guddi ahaan waxaan idinkaga fadhinaa in naga xigsataan fahdiyada Golaha Baarlamaanka si loo mariyo sharuucyada muhiimada wayn u leh dalkeenna” ayuu yari Wasiirka Maxamuud.
Gudoomiyaha gudiga Miisaaniyadda, Qorsheynta iyo La xisaabtanka hay’adaha Golaha Shacabka Jumhuuriyadda Federaalka Soomaaliya Mudne Maxamed Faarax Nuux ayaa sheegay in ka guddi ahaan diyaar u yihiin dar-dargalinta shaqooyinka kala duwan ee Wasaaradda iyo guddiga ka dhexeeyso.
Kullanka ayaa ahaa midkii ugu horeeyey ee yeeshan Wasaaradda Qorsheynta, Maalgashiga iyo Horumarinta Dhaqaalaha Xukuumadda Soomaaliya iyo Guddiga Miisaaniyada, Qorsheynta iyo La-xisaabtanka Hay’addaha Dowladda, iyadoo hoosta si wadajira looga xariiqay joogteynta kullamada noocaan oo kale ah.
