Safiirka Soomaalia ee dalka Kenya Danjire Jabriil Ibraahim Cabdulle ayaa magaalada Nairobi ee dalkasi ku soo dhaweeyay wafdi uu hogaaminayo Gudoomiyaha golaha shacabka BJFS Mudane Sheekh Aadan Maxamed Nuur “Madoobe” , halkaasi oo ay sidoo kale ku soo dhaweeyeen mas’uuliyiin ka tirsan dowladda Kenya.
Guddoomiye Sheekh Aadan Madoobe iyo wafdiga uu hogaaminayo ayaa ka qeygalaya shirka guddoomiyeyaasha Baarlamaanka Urur Goboleedka Iskaashiga dhaqaalaha Bulshada Afrika, kaasi oo lagu qabanayo magaalada Nairobi ee xaunta dalka Kenya.
Safiirka Soomaalia ee dalka Kenya Danjire Jabriil Ibraahim Cabdulle oo Warbaahinta la hadlay ayaa sheegay in shirka uu socon doono muddo labo cisho ah, halkaasi oo uu guddoomiyiyuhu kaga warbixin doono guud ahaan horumarka ay Soomaaliya ku talaabsatay iyo xoojinta xiriirka Baarlamaanada ku jira dalalka Urur Goboleedka Iskaashiga dhaqaalaha Bariga Afrika.
Soomaaliya ayaa kaalin firfircoon kusoo gashay Urur Goboleedka Iskaashiga dhaqaalaha bariga Afrika,waxaana shirkaan daba-socdaa shirar kale oo heer Madaxweyne ah.
