Guddoomiyaha Degmada Hobyo Cabdullaahi Axmed Cali Faat oo isbitaalka ku booqday dhaawacyada laga keenay deegaanka Wisil ee Gobolka Mudug ayaa sheegay in iminka ay xaaladooda soo hagaageyso, isagoo ku baaqay in si wada jir ah looga soo wada jeesto dagaalka ka dhanka ah argagixisada Al-Shabaab.
Mudane Cabdullaahi Axmed Cali Faat oo la hadlay Radio Muqdisho ayaa tilmaamay in shacabka looga fadhiyo inay xoojiyaan taageerada ciidamada, isagoo intaa ku daray in
“Runtii waxaan u mahadcelinayaa dowladda Federaalka oo gurmad caafimaad u fidisay shacabka iyo askartii ku dhaawacantay duulaankii ay Wisil ku soo qaadeen dhagar qabayaasha Al-Shabaab, xaqiiqdii shacab iyo ciidan waxaa naga go’an inaan si wada jir ah ula dagaalano argagixisada Al-Shabaab oo aan ka xoreyno deegaannada ay gobolka kaga suganyihiin”. Ayuu yiri Mudane Cabdullaahi.
Guddoomiyaha Degmada Hobyo Cabdullaahi Axmed Cali Faat ayaa sheegay in ujeedka socdaalkiisa Muqdisho ay ugu weyntahay sidii uu kulamo ula qaadan lahaa bulshada ka soo jeedda gobolka, sidii ay maalgashi ugu sameynsan lahaayeen deegaankooda.
Mudane Cabdullaahi Axmed Cali ayaa xusay in degmada ay iminka ka socdaan mashaariic horumarineed, isla markaana ay dhiiri gelinayaan dadka u taagan in deegaankooda ay maagashadaan.
