Guddoomiyaha degmada Waabari ee gobolka Banaadir Mudane Xuseen Maxamed Culusow oo dhawaan la wareegay xilka guddoomiyenimo ayaa ugu horeyn ugu baaqay bulshada ku dhaqan degmada in ay ka qayb qaataan horumarka degmada isla markaana ay maamulkiisa ku garab istaagaan xoojinta amniga iyo kor u qaadista nadaafadda isla markaana ay u hogaansamaan awaamirta maamulka ka soo baxaysa.
Guddoomiyaha degmada Waaberi oo la hadlay Warbaahinta Qaranka ayaa yiri “Anigu saddex maalin ayaan xafiiska joogaa, horana waan ugu baaqay haddana waan ku daraa, waxaan ka codsanayaa shacabka degmada in ay maanulka la shaqeeyaan ciidamada ammaanka kala shaqeeyaan, nadaafadu waa qodobka noogu muhiimsan”.
Guddoomiyaha degmada oo ay wehliyaan ku-xigeenadiisa iyo saraakiisha ciidanka amniga degmada ayaa kormeeray waddada Via Liberia oo maanulku ka sameeyay howlgal looga qaadayo ganacsiga waddada dhex deeda soo galay, iyadoo amar lagu siiyay bulshada in waddada aysan ku ganacsan.
“Waddada Liberia waxaa ay ka mid tahay waddooyinka muhiimka ah ee degmada waxaa jira dad ku dhex ganacsada, bilic ahaan iyo amni ahaanba uma wanaagsana waxaan u sheegeynaa dadkaas in ay ka waantoobaan”ayuu yiri Guddoomiye Xuseen.
Taliska ciidanka ilaallada degaanka ee degmada Waabari ayaa digniin u diray dadka dhismayaasha sharci darada ah ay uga dhisan yihiin degmadaas, waxaana uu sheegay qofkii mudo 10 cisho gudahood ah aan u hugaansamin amarka in laga bur burin doono dhismayaasha sharci darada ah .
