Guddoomiyaha Gobolka Banaadir Ahna Duqa magaalada Muqdisho Mudane Yuusuf Xuseen Jimcaale (Madaale) ayaa xarunta Aqalka Dowladda Hoose ee Xamar kulan kula qaatay Ergeyga gaar ah ee Qaramada Midoobay u qaabilsan Soomaaliya Danjire James Swan iyo Ku-xigeenka Ergeyga ee Arrimaha Beni-aadannimada Mr. Adam Abdelmoula.,iyadoo ay goobjoog ka ahaayeen Guddoomiye Ku-xigeenka Maamulka Gobolka Banaadir ee Arrimaha Bulshada iyo Xoghayaha Guud.
Danjire James Swan ayaa ugu horeyn Duqa magaalada Muqdisho ugu Hambalyeeyay xilka marlabaad loo soo Magacaabay, isagoo u rajeeyay in uu waxbadan ka qaban doonno horumarka, Dib-u-dhiska, Kobaca dhaqaalaha, Amniga, Bilicda iyo Shaqo Abuurka Dhallinyarada. Taasi oo uu sheegay in Xafiiska Qaramada Midoobay ee Soomaaliya uu garab kusiin doonno Maamulka Gobolka Banaadir, sidii tiirarkaasi muhiimka ah looga dhabeyn lahaa.
Sidoo kale kulanka ayaa waxaa diirada lagu saaray Xaalada Abaaraha ee dalka ka jira iyo dadka kusoo barakacay Caasimada Muqdisho sidii loogu gurman lahaa, isla markaana Maamulka Gobolka Banaadir iyo Hey’adda QM isaga kaashan lahaayeen u gurmashada Barakacayaasha iyo sidii gar-gaarka kadib xal waara loogu sameyn lahaa dadka kusoo barakacay Caasimadda Muqdisho.
