Wadadaan isku xirta xarrunta Maamulka Degmada Warta Nabadda iyo xaafadda Geed-Jacely ee magaalada Muqdisho oo dhawaan la soo gabo gabeeyay dib u dayactirkeeda, kaddib markii uu sameeyay bur bur xooggan oo sabab u ah dagaalladii sokeeye ee dalka ka dacay ayaa waxaa maanta xarigga ka jaray Guddoomiyaha Gobolka Banaadir ahna duqa Muqdisho Mudane Xasan Maxamed Xuseen “Muungaab” oo ay wehliyaan mas’uuliyiin ka tirsan maamulka Gobolka.
Guddoomiyuhu markii uu gaaray xarrunta degmada Warta Nabadda ayaa waxaa halkaasi ku soo dhaweeyay qeybaha kala duwan bulshada, kuwaasi oo wajiyadooda laga dheehanayay farxad ku aadan dib u furista wadadaasi oo saameyn ku yeelatay isu socodka gaadiidka iyo dadweynaha isticmaala wadada.
Guddoomiyaha Degmada Warta Nabadda, Yaasiin Nuur Ciise oo la hadlay Warbaahinta ayaa uga mahadceliyay maamulka Gobolka Banaadir fududeynta dib u dayactirka lagu sameeyay wadada isku xirta xarrunta maamulka iyo xaafadda Geed-jaceyl ama wadada Wadnaha ee magaalada Muqdisho
Guddoomiyaha gobolka Banaadir ahna duqa Muqdisho mudane Xasan Maxamed Xuseen “Muungaab” oo la hadlay shacabka ayaa kula dar daarmay in ay ka shaqeeyaan billicda wadada, maadaama dib u dayactir lagu sameeyay.
Dib u dayactirka wadadan lagu sameeyay ayaa qeyb ka ah dadaallada uu maamulka Gobolka Banaadir ugu jiro horrumarinta adeegyada bulshada.
