Guddoomiyaha Gobolka Mudug ee Puntland ayaa faahfaahin ka bixiyay hannaanka loo maray cadaaladooda Shabakado ka tirsan Al-Shabaab oo Gaalkacyo lagu Maxkamadeeyay.
Guddoomiyaha Gobolka Mudug ee Puntland Mudane Cabdiladhiif Muuse Sanyare oo wareysi gaar ah siiyay Radio Muqdisho ayaa xusay in dhagar qabayaasha Al-Shabaab ay ka shaqeeyeen isku dirka bulshada degan Gobolka, isagoo intaa ku daray in howlgalladu ay noqdeen kuwa guuleystay.
Related posts
“Gobolka muddo sanad ah ayaan howlgal ka wadnay oo Al-Shabaab lagula dirirayay, runtii howlgallada waa ay guuleysteen intooda badan”. Ayuu yiri Guddoomiye Sanyare.
Mudane Cabdiladhiif Muuse Sanyare Guddoomiyaha Gobolka Mudug ee Puntland ayaa tilmaamay in haatan ay gacanta ku hayaan Maleeshiyaad ka tirsan argagixisada, isla markaana 18 ka mid ah horjoogayaashii argagixisada la toogta 27kii June.
“Maxkamaddu dhawaan waxa ay xukuntay 8 ka mid ah Shabakad ka tirsan Al-Shabaab oo magaalada la keenay 10 sano kahor, kuwaas oo loo saneeyay goobo ganacsi oo been abuur ah, waxaana ay u qaabilsanaayeen dhanka madax jebinta”. Ayuu yiri Guddoomiyuhu
Guddoomiyaha ayaa sheegay in labada Maamul ee Puntland iyo Galmudug kala shaqeyn doonaan sidii guud ahaan Gobolka looga cirib tiri lahaa agagixisada Al-Shabaab, maadama haatan lagu guuleystay amniga magaalada Gaalkacyo.
