Guddoomiyaha ururka Haweenka qaranka Batuulo Shiiq Axmed Gabale iyo xubna ka tirsan ururka oo maalmihi u dambeeyay ku sugnaa Magaalada Jowhar ee xarunta gobolka Shabeelaha Dhexe ayaa kulan la qaatay guddiga Fududueynta Shirka maamul u sameynta gobolada Hiraan iyo shabeelaha dhexe.
Kulanka ayaa ka dhacay xafiiska guddiga Fududeynta ee xarunta Shirka uu ka socdo, waxaana diirada lagu saaray sidii haweenka ka soo jeeda labada gobol ay u heli lahaayeen Soddon boqolkiiba Golayaasha maamulka loo dhisayo gobolada Hiiraan iyo Shabeelaha Dhexe.
Kulankaasi kadib guddoomiyaha ururuka Haweenka qaranka ayaa kormeertay xarunta Shirka oo ay ku jireen ergooyin ka soo jeeda labada gobol.
Marwa Batuula Shiiq Axmed guddomiyaha ururka Haweenka qaranka ayaa markaa kadib Warbaahinta qaranka ugu warantay Kulanka ay la qaateen xubnaha guddiga fududeynta shirka ee wasaaradda arrimaha gudaha iyo u jeedka ay u joogaan magaalada Jowhar, waxaana ay tilmaantay inay muhiimada tahay in la caddeeyo qoondada Haweenka si doorka haweenka uu meesha uga muuqdo.
Marwa Batuula shiiq Axmed oo raja wanagsan ka muujisay sida uu u socda shirka iyo inuu guul ku dhammaado ayaa waxa ay sheegtay in ay la kulmi doonaan dhaqanka iyo qeybaha Bulshada si loo xaqiijiyo doorka Haweenka ee maamulka la dhisi doono.
Guddoomiyaha guddiga Fududeenyta Shirka Maamul u sameynta Hiiraan iyo shabeelaha dhexe ee wasaaradda arrimaha gudaha Ciise Maxamuud Samoow ayaa sheegay in guddiga ay soo dhaweynayaan dadaalka ururka Haweenka qaranka ee la xiriira in haweenku ay helaan qoondadooda.
Wariye C/shakuur Cali Axmed Jowhar
