Guddoomiyaha Hay’adda Maareynta Musiiiboyinka, Mudane Maxamuud Macallin Cabdulle, ayaa maanta magaalada Muqdisho ka furay shir looga hadlayo dhisidda Guddiga Xiriirka Maareynta Musiibooyinka ee heer Qaran, waxaana kala soo qeyb galay Agasimaha guud ee Wasaaradda degaanka iyo is-beddelka cimilada Yuusuf Cabdiraxmaan Samatar, Agaasimaha waaxda gargaarka gobolka Banaadir Muxyadin Maxamuud, iyo Guddoomiye ku-xigeenka Rugta Ganacsiga Cabdiraxmaan Galaanbe.
Shirkan ayaa waxa ka qeybgalay Wasaaradaha Arimaha Gargaarka iyo Maaraynta Musiibooyinka ee Dowlad goboleedyada, Hay’ado heer Federaal ah, khubarro iyo saraakiil sare oo ka socotay Hay’adda Cunnada Aduunka ee Qaramada Midoobay, Rugta Ganacsiga, bulshada rayidka ah iyo madax ka socoday xafiiska Somali Crises Recovery Program waxaana maalgaliyay dhisidda guddigan Baanka Aduunka.
Guddoomiyaha Hay’adda SoDMA, Maxamuud Macallin ayaa kawarbixiyey u jeedka shirkaan, isagoo xusay in Maareynta Musiiboyinka aysan ku filneen hal Hay’ad, loona baahanyahay in la isku kaashado sida loo maaraynayo masiibooyinka dalka ka dhaca ee dhibaateeya dadka, degaanka iyo dhaqaalaha.
