Guddoomiyeha Degmada Hodan Mudane Abdihakiin Cabdirixman Ciiise (Dhagajuun) ayaa ka tacsiyeeyay dadkii rayidka ahaa iyo askartii ku shahiidday weerarkii bahalnimada ahaa ee argagixisada Alshabaab ay ku beegsadeen Degmada.
Guddoomiyaha ayaa ku bogaadiyey shacabka Degmada Hodan sida ay ugu gurmadeen dadkii ku waxyeeloobay qaraxii argagixisanimo iyo isku- duubnida ay muujiyeen.
“Dadka ku dhaqan Degmada Hodan oo isku duuban waxa ay dib u dhisi doonaan Masaajidkii, goobaha ganacsigii iyo Xarunta Degmada ee argagixisadu burburisay, waxa ayna muujin doonaan in aysan u liicayn falalka ay maleegayaan argagixisada Alshabaab.”
Guddoomiyaha ayaa ugu baaqay bulshada Degmada Hodan in ay xoojiyaan lashaqeynta laamaha ammaanka, si loo dabar gooyo falalka gaadmada ah ee argagixisada, loogana hor tago gumaadka ay ku hayaan shacabka.
