Guddoomiyaha Hay’adda Maareynta Musiibooyinka Qaranka (SoDMA) Mudane Maxamuud Macallin Cabdulle, ayaa maanta daahfuray kulan ku saabsan diyaar-garowga iyo wax ka qabashada arrimaha bani’aadantinimada, gaar ahaan saameynta ay haweenka iyo bulshada nugul ku yeelan karaan xaaladaha cimilada.
Guddoomiyuhu wuxuu sheegay in xilligan uu yahay waqti muhiim ah oo Soomaaliya loogu diyaar-garoobayo saameynta El Niño.
Kulanka waxaa ka qeybgalaya hay’adaha dowladda, Qaramada Midoobay, hay’adaha samafalka, bah-wadaagta ka shaqeysa arrimaha bani’aadantinimada, iyo ururrada u dooda ilaalinta xuquuqda haweenka.
Guddoomiyaha SoDMA Mudane Maxamuud Macallin Cabdulle, ayaa adkeeyay in saameynta cimiladu si gaar ah u taabato haweenka, carruurta, dadka qaba baahiyaha gaarka ah iyo barakacayaasha. Sidaas darteed, wuxuu tilmaamay muhiimadda ay leedahay in arrimaha jinsiga iyo ka-qaybgalka bulshada lagu daro qorshayaasha diyaar-garowga laga bilaabo bilowga.
Ugu dambeyn, Guddoomiyuhu wuxuu ku baaqay in la xoojiyo wada-shaqeynta, isku-duwidda iyo xog-wadaagga u dhexeeya Dowladda, Qaramada Midoobay, NGO-yada iyo bah-wadaagta bani’aadantinimada, iyadoo la kordhinayo ka-qaybgalka haweenka iyo bulshada nugul, si loo helo jawaab-celin isku-duwan oo waqtigeeda ku habboon, looguna diyaar-garoobo saameynta El Niño.
