Muqdisho, 31 Agoosto 2026: Guddoomiyaha Maamulka Gobolka Banaadir ahna Duqa Muqdisho Dr. Xasan Maxamed Xuseen (Muungaab), ayaa maanta kormeeray deegaanka Xaaji-Cabdi ee degmada Gubadley, halkaas oo Maamulka Gobolka Banaadir u qorsheeyay in dib-u-dejin loogu sameeyo shacabka ay saameeyeen qorshayaasha casriyeynta Caasimadda.
Deegaanka oo dhawaan laga hirgeliyay Dugsi Hoose iyo Dhexe oo lacag la’aan ah, ayaa sidoo kale leh adeegyada aasaasiga ah ee nolosha, sida biyaha iyo korontada. Waxaa sidoo kale loo qorsheeyay in laga dhiso suuq, masaajid iyo rug caafimaad.
Guddoomiyaha Gobolka Banaadir ayaa sheegay in tallaabadan la fulinayo iyadoo la raacayo amarka iyo jihaynta Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, kaas oo faray in casriyeynta Caasimaddu ay barbar socoto ilaalinta xuquuqda iyo karaamada muwaadiniinta.
Waxa uu xusay in Maamulka Gobolka Banaadir uu bixiyay 1,058 boos oo dhul ah oo loogu talagalay dadka ay saameeyeen hawlaha jid-bixinta, kuwaas oo si lacag la’aan ah loogu wareejinayo qoysaska guryahoodu ku yaallaan goobaha laga hirgelinayo waddooyinka cusub.
Duqa Muqdisho ayaa sidoo kale sheegay in qorshaha dib-u-dejinta la sii ballaarin doono, iyadoo dhulal cusub laga iibin doono degmooyinka Daarusalaam, Kaxda iyo Garasbaaleey, si halkaas loo dejiyo qoysas kale oo ay saameeyeen hawlaha casriyeynta Caasimadda.
Kormeerka waxaa Duqa Muqdisho ku wehliyay Guddoomiye Ku-xigeenka Arrimaha Bulshada iyo Wacyigelinta, Mudane Cabdicasiis Cismaan Maxamed, Guddoomiyaha Guddiga Xallinta Khilaafaadka Dhulka iyo agaasimayaal ka tirsan waaxyaha Maamulka Gobolka Banaadir.
Dhanka kale, Wasaaradda Hawlaha Guud iyo Guriyeynta XFS ayaa waddo qorshe lagu dhisayo 10,000 oo guri oo loogu talagalay shacabka Soomaaliyeed.
