Ra’iisul Wasaaraha XFS Mudane Xamsa Cabdi Barre, ayaa kulan la yeeshay Ra’iisul Wasaare Ku-xigeenka Qatar ahna Wasiirka Difaaca Mudane Sheekh Sucuud Bin Cabdiraxmaan Bin Xasan Al Taani.
Kulanka oo qayb ka ahaa kulamadii rasmiga ahaa ee uu Ra’iisul Wasaaruhu la qaadanayay madaxda ugu sarreysa dalka Qatar, ayaa looga wada hadlay xoojinta iskaashiga labada dal ee dhinacyada amniga, difaaca iyo xasilloonida gobolka iyo dunida, gaar ahaan sidii si wadajir ah looga hortagi lahaa khataraha ka dhasha argagixisada xuduudaha ka gudubta, kuwaas oo halis weyn ku haya Soomaaliya.
Ra’iisul Wasaare Xamsa ayaa Sheekh Sucuud uga warbixiyay guulaha laga soo hooyay amniga magaalooyinka waaweyn iyo hawlgallada lagu qaaday kooxaha Khawaarijta.
Dhankiisa, Ra’iisul Wasaare Ku-xigeenka Qatar, Sheekh Sucuud Bin Cabdiraxmaan Bin Xasan Al Taani, oo booqday hoyga uu Ra’iisul Wasaaraha Soomaaliya ka deggan yahay magaalada Dooxa, ayaa sheegay in Dowladda Qatar ay garab taagan tahay Soomaaliya, ayna diyaar u tahay in la sii ballaariyo iskaashiga labada dal ee dhinacyada kala duwan.
Ra’iisul Wasaaraha XFS, Mudane Xamsa Cabdi Barre, ayaa Ra’iisul Wasaare Ku-xigeenka Qatar uga mahadceliyay soo dhoweynta diirran ee isaga iyo wafdigiisa, iyo heerka sare ee uu gaaray xiriirka labada dal.
Waxa uu si gaar ah uga mahadceliyay sida ay Dowladda Qatar u garab istaagtay qaranimada Soomaaliya xilliyadii dalka lagu soo xadgudbay.
