Guddoomiyaha Golaha Shacabka Baarlamaanka JFS ahna Ku-simaha Madaxweynaha Mudane Sheekh Aadan Maxamed Nuur (Madoobe) ayaa ku baaqay in si degdeg ah oo shuruud la’aan ah loo joojiyo rabshadaha iyo qalalaasaha ka socda magaalada Garoowe ee Caasimada Maamulka Puntland.
Guddoomiyaha ayaa sheegay in dagaalku uusan xal u ahayn khilaafka siyaasadeed, waxaana uu maamulka Puntland, oo ay ugu horreeyaan Odoyaasha dhaqanka, siyaasiyiinta, ganacsatada iyo dhammaan qeybaha kala duwan ee bulshada rayidka ugu baaqay in ay qaataan doorkooda ku aaddan daminta colaada, lagana shaqeeyo xasiloonida deegaanka oo ay caan ku yihiin dadka reer Puntland.
Guddoomiyaha Golaha Shacabka BJFS ayaa ku booriyay wax kasta oo keeni kara kala aragti duwanaansho siyaasadeed in lagu xaliyo miiska wada hadalka, iyadoo la dhowraayo nabadda isla-markaana aan la barakicin shacabka, isagoo Alle uga baryay intii ku dhimatay inuu naxriistiisa janno ka waraabiyo inta ku dhaawacantayna Eebbe caafimaad deg deg ah siiyo.
Dhina kale Guddoomiye Ku-xigeenka koowaad ee Golaha Shacabka Baarlamaanka Jamhuuriyadda Federaalka Soomaaliya Marwo Sacdiya Yaasiin Xaaji samatar ayaa baaq nabadeed udirtay hogaanka iyo Shacabka Puntland. Iyadoo ku baaqday in si degdeg ah loo joojiyo dagaalada ka socda magaalada Garoowe ee Caasimada Maamulka Puntland.
Guddoomiye Sacdiyo ayaa Isimada, ganacsatada, ururada bulshada iyo siyaasiyiinta ugu baaqday in ay qaataan kaalintooda ku aaddan joojinta dagaalka, lagana shaqeeyo nabada iyo xasiloonida deegaanka.
