Kulankan oo ahaa shirka 57aad ee Guddiga Joogtada ah ayaa qeybtiisa hore waxaa shir guddoominayey Gudoomiyaha Golaha Shacabka Jamhuuriyadda Federaalka Soomaaliya Mudane Maxamed Sheekh Cusmaan Jawaari waxaana guddiga Joogtada ah ay si aad ah isula eegeen Ajandayaasha ugu muhiimsan ee kulammada Baarlamaanka ay noqon doonaan todobaadka soo socda iyo sida horutebin loo kala siin lahaa sharciyada horyaala Golaha Shacabka.
Gudoomiye ku xigeenka Labaad ee Baarlamaanka Federaalka Soomaaliya Mudane Mahad Cabdalla Cawad oo isagu shir gudoominayey qeybtii dambe ee shirka todobaadlaha guddiga Joogtada ah ayaa waxaa markii uusoo gebageboobay kulanka la hadlay Warbaahinta Qaranka waxaana uu faah faahin ka bixiyey waxyaabihii looga hadlay shirka Guddiga Joogtada ah ee maanta.
Related posts
Howlaha ugu horeeya ee kulammada baarlamaanka horyaala waxaa ka mid ah dhageysiga warbixinnada ay Xildhibaannadu kasoo diyaariyeen deegaannada ay metelaan oo Mudaneyaasha Baarlamaanku booqasho ku tageen intii lagu jiray fasaxa Kalfadhiga Golaha Shacabka, dhageysiga warbixin la xiriirta wax ka bedelka Xeer Hoosaadka Golaha Shacabka oo guddiga Xeer Hoosaadka,Anshaxa iyo Xasaanadda ay Baarlamaanka hor keenaan Kalfadhi kasta bilowgiisa.
Guddiga Joogtada ah ee Baarlamaanka oo ka kooban Guddoonka Baarlamaanka,Guddoomiyeyaasha guddiyada joogtada ah ee Baarlamaanka iyo Habdhowrka ayaa inta badan diyaariya ajandayaasha kulammada Baarlamaanka la horgeynayo waxaana sharciyada hada horyaala Baarlamaanka ee la doonayo in Golaha la horkeeno ka mid ah Diyaarinta Hindise Sharciyeedka Xakameynta Hubka, Sameynta Sharciga Lagu dhisayo Guddiga Amniga Qaranka iyo Hindise Sharciyeedka La Dagaalanka Argigixisada.
