Gudoomiyaha Baarlamaanka Federaalka Soomaaliya Mudane Maxamed Sheekh
Cusmaan Jawaari ayaa magaalada Kampala ee caasimadda dalka Uganda ugu soo
xeray Guddiga Axsaabta ee Baarlamaanka kulan howleed ay kusoo
gebagebeeyeen diyaarinta Sameynta Sharciga Xisbiyada siyaasadeed ee Dalka.
Kulan howleedkan oo mudo laba todobaad ah uga soconayey guddiga Axsaabta
ee Baarlamaanka Federaalka Soomaaliya magaalada Kampala ee caasimadda
dalka Uganda ayaa ahaa dhameystirkii ugu dambeeyey ee diyaarinta sharciga
sameynta Axsaabta siyaasadeed ee dalka taasi oo qeyb ka ah tiirarka
sharuucda ugu waaweyn ee dalkan lagu gaarsiin karo doorasho xor ah.
Gudoomiyaha Guddiga Axsaabta ee Baarlamaanka Federaalka Soomaaliya Prof
C/risaaq Cusmaan Jurile oo munaasabadda xeritaanka kulan howleedkan hadal
ka jeediyey ayaa tilmaamay in maanta guddiga Axsaabta ee Baarlamaanka ay
sharaf weyn u tahay in Guddoonka Baarlamaanka ay ku wareejiyaan sharciga
Axsaabta dalka ee loo igmaday sameyntiisa waxaana uu dhanka kale Gudoomiye
Jurile faah faahin ka bixiyey marxaladihii kala gedisnaa ee uu sharcigan
sameyntiisa soo maray.
Gudoomiyaha Golaha Shacabka Jamhuuriyadda Federaalka Soomaaliya Mudane
Maxamed Sheekh Cusmaan Jawaari oo jeediyey khudbaddiisa xeritaanka kulan
howleedkan ayaa ugu horeyn uga tacsiyadeeyey xubnaha guddiga Axsaabta ee
Baarlamaanka geerida ku timid Allaha u naxariistee Xildhibaan Xuseen
Baantuu oo ka mid ahaa xubnaha guddigan, mahad celin ayuuna u jeediyey
hay’adda Oslo Center oo kulan howleedkan fududeyneysay, Wasaaradaha
Arrimaha Gudaha,Dastuurka, Xafiiska Ra’isulwasaraha iyo safaaradda
Soomaaliyeed e dalka Uganda waxaana uu Gudoomiye Jawaari ka hadlay
muhiimadda Sharcigan iyo baahida ay shacbiga Soomaaliyeed u qabaan.
Gudoomiyaha Baarlamaanka Federaalka Soomaaliya Mudane Maxamed Sheekh
Cusmaan jawaari oo hadalkiisa sii wata waxa uu tilmaamay in sharcigan qeyb
ka yahay dhaxalka ay dhalinyarada Soomaaliyeed ka dhaxli doonaan Golaha
Shacabka hada jira oo ah Madasha 9aad ee Baarlamaannadii Dalkeenna soo
maray waxuuna ka ballan qaaday ammaan iyo bogaadin kadib xubnaha guddiga
Axsaabta ee sharcigan soo diyaariyey in marka uu fumo Kalfadhiga 6aad ee
Baarlamaanka sharcigan la horgeyn doono Golaha.
Sharcigan waxa uu ku biirayaa sharciyo uu Baarlamaanka Federaalka
Soomaaliya diyaariyey, qaarkoodna la ansixiyey kuwaasi oo xudun u ah
hiigsiga Baarlamaanka ee kala ah:- dib u eegista Dastuurka,Federaaleynta
iyo Dimuqraadiyeynta dalka, geesta kalena waxa uu kulan howleedkan gebo
gebo u yahay kulammo howleedyo,aqoon kororsiyo iyo shirar caalami ah oo
inta lagu guda jiray fasaxa Kalfadhiga Golaha Shacabka uga soconayey
Kampala guddiyada kala duwan ee Baarlamaanka iyo howlwadeennadooda.
—DHAMMAAD—
