Guddoomiyaha Baarlamaanka Soomaaliya Maxamed Shiikh Cismaan Jawaari ayaa kulan la qaatay Bahda isboortiga dalka, ayadoo kulanka ay sidoo kale ka qeyb galeen masuuliyiinta wasaaradda dhalinyarada iyo isboortiga, Guddiga Olombikada Soomaaliyeed, Madaxa xiriirada, Xildhibaano iyo waliba qaar ka mid ah masuuliyiintii, macalimiintii, ciyaartoyiy iyo Garsoorayaashii hore ee dalka.
Guddoomiyaha Guddiga Olimbikada Soomaaliyeed Cabdullahi Axmed Tarabi waxuuna aad uga sheekeeyey in GOS iyo xiriirada xubnaha ka ahiba ay horumarinta isboortiga dalka ka soo shaqaynayeen xilliyo aad u adag oo dalka uusan dowlad laheyn, si ay u abuuran is dhex gal bulsho, uga hortagaan in dhalinta Soomaaliyeed waqtigooda u isticmaalaan waxyaabo qaldan.
“Waxaa hadda la joogaa xiligii ay dawladda Soomaaliyeed qaadan lahayd kaalinta uga aadan sare u qaadida isboortiga dalka isla markaana uga taageeri lahayd hay’adahan ku mashquulsan hawlahaasi sidii ay u gaari lahaayeen hadafkooda, waxaanan si sharaf iyo xushmad ku jirto kaaga codsanaynaa in aad codkayaga gaarsiiso dawladda Soomaaliyeed aadna si hagar la’aan ah uga qayb qaadataan horumarka isboortiga dalka maadaama aan ka baxnay xiligii kumeel gaarka” ayuu yiri guddoomiye Tarabi.
Wasiirka wasaaradda dhalinyarada iyo isboortiga Maxamed Cabdullaahi Xasan Nuux oo ka hadlay kulankaan ayaa mahad celin u soo jeediyay Guddoomiyaha GOS Cabdullaahi Tarabi, wuxuuna wasiirku dhanka kale tilmaamay in dhallinyaradu yihiin tiirka nabadda wasaaraduna ay xooga saari doonto horumarinta cayaaraha dalka,, asagoo hoosta ka xariiqay in ay soo dhawaynayaan in dhamaan dadka ku hawlan hawlahan ay aragtidooda iyo fikirkooda is dhaafsadaan isma markaana ay meelmariyaan ayagoo midaysan.
Ugu dambayn waxaa halkaas ka hadlay Guddoomiyaha Baarlamaanka dalka mudane Maxamed Shiikh Cusmaan Jawaari, waxuuna sheegay in isboortigu uu yahay laf dhabarka arimaha bulshada barlamaankuna uu dowr muhiim ah ka qaadanayo sidii loo horumarin lahaa.
“Waxaad haysataan wasiir dhalinyaro ah isla markaana xildhibaan ah diyaarna u ah in uu isboortiga horumariyo, waxaan aqoon wanaagsan u leeyahay isboortiga iyo kaalinta uu ka qaadan karo nabadaynta dalka waxaan idiin xaqiijinayaa in albaabka barlamanaka uu idiin furan yahay isla markaana ay qayb libaax ka qaadan doono hawlaha baaxadda leh ee aad haysaan” ayuu yiri afhayeenka baarlamaanka dalka mudane Maxamed Sh, Cusmaan Jawaari
