Gudoomiyaha gobolka Hiiraan C/fitaax Xasan Afrax ayaa maanta kormeer ku tagay cisbitaalka guud ee Beledweyn, isagoo u kuurgalay sida ay u socdaan howlaha shaqo ee isbitaalka u hayo bulshada ku nool gobolka Hiiraan.
Gudoomiyaha ayaa ku soo wareegay qeeybaha kala duwan ee isbitaalku koobanyahay, isagoo warbixin ku saabsan xaaladda isbitaalka iyo baahida ka jirta ka dhageystay maamulaha isbitalka guud ee magaalada Beledweyne.
C/fitaax Xasan Afrax gudoomiyaha gobolka Hiiraan ayaa kormeerkiisa kaddib sheegay in isbitalka ay ka jirto dhibaatooyin kala duwan oo ay ugu horreyso dawo la’aan, isagoo tilmaamay in kormeerkiisu ku qotomo sidii uu u ogaan lahaa baahida ka jirta cisbitaalkaasi.
“Manta waxaan soo booqday isbitaalka guud ee magaalada Beledweyne oo ah isbitaalka ugu weyn gobollada dhexe, wax yaabahya keenay in aan soo booqdo ayaa waxaa ka mid ah, waxaa Isoo gaaray cabashooyin bulshada xageeda ka timiday, muhiimadda guud waxaa waaye isbitaalka in isbitaalka ay ka jiraan dhibaatooyion badan, daawo la’aan ayaa ka jirto isbitaalka, dhamaan waan soo firiyay, farmashiyaha cusbitaalka wax daawo ah ma yaalaan” ayuu yiri C/fitaax Xasan Afrax.
Gudoomiyaha ayaa hoosta ka xariiqay in maamulkiisu uu wax ka qaban doono baahida isbitaalka hadba intii uu awoodo, wuxuuna ugu baaqay hey’adaha gargaarka iyo jaaliyadaha ka soo jeeda gobolka iney caawiyaan isbitaalka si uu usii wato adeegyada caafimaad ee uu bulshada u hayo.
Tan iyo markii hey’adda MSF ay joojisay howlihii ay ku caawin jirtay isbitaalka guud ee Beledweyne ayaa waxaa isbitaalka soo wajahay dhibaatooyin kala duwan oo ay ugu horeyso dawo la’aan iyo shaqaalaha oo aan helin wax mushaaraad ah, iyadoo howlwadeenada isbitaalku ay ku sii shaqeynayaan ilaa iyo xilligaas si mutadawacnimo ah.
