Gudoomiye ku xigeenka Labaad ee Golaha Shacabka Jamhuuriyadda Federaalka Soomaaliya Mudane Mahad Cabdalla Cawad ayaa magaalada Kigali ee caasimadda dalka Rwanda tababar sare loogu qaadayey aqoontooda ugu soo xeray guddiga Garsoorka,Awqaafta iyo Arrimaha Diinta ee Baarlamaanka Federaalka Soomaaliya.
Siminaarkan oo socday mudo Shan cisho ah ayaa waxaa Guddiga Garsoorka,,Awqaafta iyo Arrimaha Diinta ee Baarlamaanka Federaalka Soomaaliya ay ku baranayeen arrimmo la xiriira hormarinta Garsoorka Dalkeenna iyo sidii loo sameyn lahaa Maxkamad Dastuuri ah taasi oo qeyb ka ah hiigsiga 2016ka.
Gudoomiye ku xigeenka Labaad ee Golaha Shacabka Mudane Mahad Cabdalla Cawad oo xeritaankii siminaarkan khudbad ka jeediyey ayaa ku ammaanay xubnaha Guddiga Garsoorka ee Baarlamaanka sida ay waqti iyo maskaxba u geliyeen iney ka faa’ideystaan tababarkan sare loogu qaadayey aqoontooda waxaana uu u rajeeyey in aqoonta ay kororsadeen laga arko waxqabad dhab ah oo ay muujiyaan xubnaha Guddigan iyo Guddiyada kaleba Kalfadhiyada Golaha Shacabka ee soo socda.
Munaasabadda xeritaanka Siminaarkan ayuu Gudoomiye ku xigeenka Labaad ee Golaha Shacabka Jamhuuriyadda Federaalka Soomaaliya Mudane Mahad Cabdalla Cawad waxa uu shahaaddo sharafeedyo guddoon siiyey xubnaha Guddiga Garsoorka,Awqaafta iyo Arrimaha Diinta ee Baarlamaanka Federaalka Soomaaliya.
