Kulan aqooneedkaan oo ay kasoo qaybgaleen, aqoonyahan, indheergarad iyo mas’uuliyiinta xoogaga u dhaq-dhaqaaqa adeega bulshada ee jaaliyada Norway ayaa ahaa mid lagu lafagurayey hanaanka tacliinta sare ee gayiga Soomaaliya xiligan, iyo gaar ahaan kaalinta udub-dhexaadka ee ay qaadan karto Jaamacadda Umadda oo iyadu dib ugu holwgashey afar sanno ka hor.
Prof. Aaden Guuleed Shabeel, gudoomiye ku xigeenka arimaha akdeemiyadda iyo cilmi baarista ee Jaamacadda Umadda oo warbixin qiiro ka jeediyey kulan cilmiyeedkaas ayaa soo bandhigey sharaxaad balaaran oo la xiriirta qaabkii ay dib ugu howlgashey Jaamacadda Umadda oo runtii u ekaa markii la dhageystey warbixintiisa wax la mid ah mucjiso.
Mudane Shabeel ayaa ku nuuxnuuxsaday sida ay biyo kama dhibcaanka u tahey in guntiga dhiisha laysiga dhigo, loona mideeyo xooga wadaniga ah, si taageero hil iyo hoo leh loola garab istaago Jaamacadda Umadda oo iyadu ah hanti iyo dhaxal Soomaali wada leedahey.
Gudoomiye Shabeel ayaa intii uu socdey kulan aqooneedkaas soo bandhigey Docment iyo macluumaad daaha ka rogeytey howsha wax ku oolka ah ee u qabsoontey Jaamacadda xiligii aadka u yaraa ee ay dib u furantey, iyadoon waliba taageero ka helin meelo kale, waxeyna soo ifbixisey sida ay suuro galka u tahey in isku tashigu u yahey jidka kaliya ee u horseedi kara bulshada Soomaaliyeed dib u soo kabasho dhab ah.
Aqoonyahanka Iyo ildheer garadka jaaliyadda reer Norway ee kulan aqooneedkaad kasoo qayb galey ayaa iyaguna waxey cadeeyeen sida ay raaliga uga yihiin uguna khushuucsanyihiin howsha geesinimada leh ee Prof.. Aaden Guuleed Shabeel iyo saaxiibadii ay dhiiradeen, kagana miro dhaliyeen howsha dib usoo nooleeynta Jaamacadda Umadda ee Soomaaliyeed.
Hogaamiyayaasha jaaliyadda iyo aqoonyahanka ayaa intii uu kulan aqooneedkaas socdey soo jeediyey hababka ugu haboon ee lagu taageeri karo Jaamacadda iyo guud ahaan, dhaq-dhaqaaqyada tacliinta dalka.
Dr. C/rashiid Cali Warsame iyo Dr. Geelle oo ah laba cilmi baare oo ka tirsan Jaamacadda Oslo, isla markaasna iyagu qayb ka ahaan aqoonyahan badan oo ka gayb galey shir cilmiyeed ay Jaamacadda Umaddu ku qabatey caasimadda Muqdisho bishii Luuliyo ee sanadkaan ayaa qirey howsha lagu taaban karo ee ay ku mashquulsanyihiin kooxda Dib u aas asayaasha Jaamacadda Umadda, waxeyna cabireen dareen niyad wanaag ku dhisanyahey ee ay ka qabaan qaabka tacliineed ee dalka marka la barnardhiggo burburkii aadka u balaarnaa ee dalka ka dhacey.
Guud ahaan kulan aqooneedkii xaley ee magaalada Oslo oo ahaa mid lagu taageerayey Jaamacadda Umadda ayaa ahaa mid dhiig cusub galiyey hanka jaaliyadda dalka Norway sidii ay uga qayb qaadan lahaayeen dib u yagleelka hanaanka waxbarasho ee dalka si loo badbaadiyo jiilasha Soomaaliyeed ee dayacan.
