Haweenka Gobalka Banaadir ayaa maanta shir ay ku taageerayeen shirka jihaynta Doorshoyinka Soomaaliya iyo saxiixa heshiiskii 17 September oo maalinta bari ah la filayo in uu ka furmo magaalada Muqdisho ku qabtay xarunta Tiyaatarka Qaranka.
Haweenka shirka kasoo qeybgalay ayaa madaxda ugu baaqay in ay dalka u turaan oo aan colaad loo horseedin, isla markaana ay taageersanyihiin dadaalada ay waddo Xukuumadda Federaalka Soomaaliya, kaasi oo ku saabsan qabsoomidda shirka iyo doorasho xor iyo xalaal ah.
Shirka waxaa ka soo qeyb galay Guddoomiye ku-xigeynka Arrimaha Bulshada iyo Wacyi gelinta Maamulka Gobalka Banaadir Marwo Basmo Caamir Axmed (Jaketti), Guddoomiyaha Ururka Haweenka Qaranka Batuulo Axmed Gabale, Guddoomiyaha ururka Haweenka Gobalka Banaadir Jawaahir Maxamuud Jaamac (Jawaahir Baarqab) iyo Haween ka kala yimid 17 Degmo ee Gobalka Banaadir.
