Baaritaano dheeraad ah oo ay Ciidamada amaanka Dalka ay 24 kii saac ee la soo dhaafay ka sameeyeen degmooyinka gobolka Banaadir qaar ayaa waxaa lagu soo qab qabtay dad lala xiriirinayo Kooxaha Nabad diidka ah Ee Al shabaab dhawaana Hay’adda NISA ay ugu yeerta UGUS,dad lagu soo qabtay isticmaalka waxyaabaha maanka dooriya iyo sidoo kale dadkii lahaa Libaxayo gabar yar ku dhaawacay degmada Cabdi casiis Ee gobolka Banaadir.
Goobaha sida gaar ah Ciidamada hay’adda NISA iyo Booliska Soomaaliyeed ay baaritaanada uga wadeen ayaa waxaa ka mid ah Xeebta Liido oo maalmaha Khamiista iyo Jimcaha ay u damaashaad tagaan Boqolaal Bulshada ku dhaqan caasimada ah iyadoo sidoo kalena la arkayay Ciidanka iyo saraakiishooda oo doomo ku dhex wata Badda isla markaana kormeeraya dadka ay suuragalka tahay in biyaha bada ay qaado
Taliyaha Saldhiga Booliska Degmada Cabdi Casiis Gaashaanle Axmed Baashane oo kamid ahaa saraakiisha howlgalada hagaysay ayaa warbaahinta u sheegay in Ciidamada Amniga ay had iyo jeer u taagan yihiin ilaalinta Amaanka dadka Soomaaliyeed.
Isgoyska Siinaa Ee Degmada Warta nabadda ayaa sidoo kale ka mid ah goobaha ay Ciidamada amaanku ka sameeyeen howgalada amni sugida ah sidoo kale waxaa halkaa lagu soo bandhigay Labo Ruux iyo Maandooriye la sheegay in ay ku sameynayeen Guri ku yaala Xaafadaas.
Afhayeeenka Wasaaradda Amniga Gudaha Maxamed Yuusuf Cusmaan oo saxafiyiinta kula hadlay ayaa sheegay in baaritaanada ay qayb ka yihiin Howlgalada lagula dagaalamay Maandooriyaha dadka ku lugta leh.
Maxamed Yuusuf Afhayeenka Wasaarada Amniga Gudaha ayaa sidoo kale waxaa uu ka hadlay kala qaybsanaanta iyo dagaalka ka dhex bilowday Hogaanka Kooxda Nabad diidka ah Ee UGUS waxaana uu sheeegay in ay Hay’adaha amnigu si dhaw ula socdaan bur burka kooxda ku socda isla markaana ay ka hortagayaan Weeraro ay ka geystaan Gudaha Caasimada.
