Guddoomiyaha Hay’adda Maareynta Musiiboyinka Qaranka Mudane Maxamuud Macallim Cabdulle ayaa shacabka Soomaaliyeed uga digay inay ka fogaadaan neelaha qatsrta uga imaan karta, maadaama laga cabsi qabo in uu Gobollada dalka qaarkood ka da’o Roobab Mahiigaan ah.
Guddoomiyaha oo shir saxaafadeed qabtay ayaa xusay in shacabku ay muujiyaan feejignan dheeri ah, isagoo xusay dhawaan Magaalada Qardho ay ku soo togmadeen daadad, sidoo kalena magaalada Muqdisho ay ka dhaceen dhimasho sababtay Roobabka.
“Shacabka Soomaaliyed haka fogadaan goobaha biyo mareenada ah, Roob xoogan oo mahiigan ah ayaa ku soo wajahan dalka sidoo kale shacabka waxaan rabnaa inay qaataan talooyinka Hay’adda, maadaama isbuuc kasta an soo saarno xaalado aan uga hadleyno Roobabka iyo Webiyada buux dhaafiyay ee laga cabsi qabo inay fatahaado ka dhashaan”. Ayuu yiri Guddoomiyaha Hay’adda Maareynta Musiibooyinka Qaranka Mudane Maxamuud Macallim Cabdulle.
Guddoomiyaha ayaa hoosta ka xariiqay inay wadaan qorsheyaal looga faa’iidaysan doona biyaha, maadaama shacabku ay mar ka cabanayaan biyo yari halka marka kalena kaga cabto fatahaadaha.
Sidoo kale waxaa isna madasha ka hadlay Agaasimaha Xarunta Qaran ee Howlgallada Gurmadka Degdega (NEOC) ee Hay’adda SoDMA, kaasi oo tilmaamay in Xarumaha kala duwan ee Hay’adda ay mar walba u taaganyihiin in ay bulshada siiyaan digniino looga hortagayo dhibaatada.
Sidoo kale Agaasimaha Waaxda Maareeynta Musiibooyinka oo ay hoos tagto Xarunta Qaran ka digista Halis-wadareedka Khadar Sheekh Maxamed Nuur ayaa ka warbixiyay cabsida weyn ee laga qabo Roob xoogan oo dalka qaybo ka mid ah ka di’i doona.
