Taliska hey’adda Nabadsugidda ee maamulka Galmudug ayaa soo saaray awaamiir la xiriirta adkeeynta ammaanka deegaannada Galmudug.
Taliyaha ciidanka Nabadsugidda ee ka howlgala deegaannada Galmudug Saadaq Cumar oo warbaahinta kula hadlay degmada Cadaado ayaa ka digay in guryo ama baabuur laga kireeyo shaqsiyaad aan la hubinin waxa ay yihiin, isagoo mamnuucay in garoomada diyaaradaha ay ka baxaan, kana soo degaan qof aan la xaqiijin waxa ay tahay.
Wuxuu sidoo kale ka digay jarista dhirta, isagoo xusay iney talaabo adag ka qaadi doonaan kuwa ku howllan xaalufinta deegaannada hoos yimaada maamulka Galmudug, wuxuuna u mahadceliyay ciidanka booliiska Galmudug oo uu sheegay iney kala qeyb qaataan howlgalada lagula dagaalamayo kooxaha jarista ku haya dhirta.
Taliyaha oo hadalkiisa sii wata ayaa sheegay in ciidanku ay qaadayaan howlgallo dheeraad ah oo lagu xaqiijinayo ammaanka, isagoo ka dalbaday bulshada ku dhaqan deegaanada Galmudug iney ciidamada kala shaqeeyaan ammaanka, wuxuuna ku boorriyay dadka deegaanka iney ku soo wargeliyaan ciidamada qofkii ay ka shakiyaan.
,
