Ciyaar xiiso badan oo dhex martey Kooxaha Dhuusamareeb iyo Cadaado kuna idlaatay barbar dhac 1-1 ayaa lagu daah furay Horyaalka heerka 1-aad ee Kubadda Cagta Galmudug oo sanadkan ay si toos ah gacanta ugu hayaan xiriirka kubadda Cagta Soomaaliyeed, isla markaana daah-furkiisa ay ka wada qayb galeen Mas’uuliyiinta Wasaaradda dhallinyarada iyo Cayaaraha Galmudug, Maamulada Degmooyinka, Maamulka Ciyaaraha Galmudug iyo daawadayaasha labada koox ee kulanka daah furka wada ciyaaray.
Xasan Axmed Shirre, Guddoomiyaha xiriirka kubbada Cagta Galmudug ayaa ugu horeyn guul iyo hormar ku tilmaamay ka guul gaaridda qabsoomidda horyaalkan oo uu sheegay in muddo lagu howlanaa bilaashadiisa.
Guddoomiye kuxigeenka xiriirka kubbada cagta Soomaaliyeed, Cali Cabdi Maxamed Cali Shine oo tilmaamay in daah furka horyaalkan looga gol-leeyahay diyaarinta ciyaaryahanadii Galmudug ku matali lahaa tartanka dowlad Goboleedyada ayaa booriyay in la soo saaro ciyaartooy xirfad sare leh.
Ugu dambeyn Wasiir kuxigeenka Wasaaradda Dhallinyarada iyo Cayaaraha Galmudug, Mahad Cali Cibaar ayaa uga mahadceliyay xiriirka kubadda Cagta Soomaaliyeed qaadashada kaalinta qabsoomidda horyaalkan.
Horyaalka heerka 1-aad ee Kubadda Cagta Galmudug oo sanadkan noqonaya markiisii ugu horeysay ee la qabto ayaa fursad u noqonaya in dhalinyarada reer Galmudug ku soo bandhigaan xirfadooda kubadda Cagta si ay uga mid noqdaan xidigaha Galmudug ku matali doona tartanka dowlad goboleedyada iyo Gobolka banaadir oo sanadkan Galmudug ka gashey kaalinta 2-aad.
