Hoteelka Central oo ku yaala degmada Xamarweyne ee gobolka Banaadir , waxaa 20 Febraayo ee sanadkan ay Maleeshiyaad ka tirsan kooxda nabad diidka ah ee UGUS ay la beegsadeen qarax isla markaana ay dhimasho iyo dhaawac ka soo gaartay mas’uuliyiin ka tirsan dowladda Soomaaliya iyo shacab ayaa maanta dib loo furey Hoteelkaasi.
Munaasabadda dib loogu furaayay Hoteelka Central ayaa waxaa ka soo qeybgalay mas’uuliyiin ka tirsan dowladda, Siyaasiyiin ,maamulka sare ee Hoteelka iyo marti sharaf kale.
Maamulaha Hoteelka Central ee magaalada Muqdisho Axmed Ismaaciil Xuseen oo goobta ka hadlay ayaa sheegay in muddo ka dib ay maanta dib u fureen Hoteelka isla markaana ay ku soo kordhiyeen qalab lagu adkeynaayo amniga Hoteelka iyo dadka imaanaya.
Ismaaciil ayaa sidoo kale sheegay in isbedel ku sameeyeen sidii loo sugayay amaanka Hoteelka isagoo tilmaamay in shaqaalaha Hoteelka ka shaqeynaya ay yihiin kuwo leh tixraac isla markaana leh qof mas’uul ka ah ruuxaasi shaqaalaha ahi.
Guddoomiye ku xigeenka degmada Xamar weyne oo kamid ahaa mas’uuliyiintii goobta hadashaya ayaa sheegay in ka maamul ahaan ay gacan ka geysan doonaan xaqiijinta amniga guud ahaan degmada isagoo ugu baaqay sugidda amniga laga wada shaqeeyo.
Xildhibaanad Luul Cabdi Aadan oo ka tirsan Baarlamaanka Soomaaliya isla markaana kamid aheyd dadkii Hoteelka ku sugnaa maalintii qaraxa uu ka dhacayay Hoteelka ayaa sheegtay in ku faraxsan tahay in mar kale dib loo howlgeliyo Hoteelka Central.
Xildhibaan Cabdalla Boos Axmed oo kamid ah Mudane ka tirsan Baarlamaanka Soomaaliya isla markaana kamid ah mas’uuliyiinta degan Hoteelka ayaa sheegay in Hoteelka ay deganaayeen mas’uuliyiin badan oo ka tirsan dowladda Soomaaliya.
Sawir Qaade: Farxaan Saleebaan Daahir
