12 Maarso 2015, Muqdisho: Madaxweynaha Jamhuuriyadda Federaalka ee Soomaaliya Mudane Xasan Sheekh Maxamuud ayaa maanta daah furey Shirkadda Caymiska ee Takaful Afrika, laanteeda Soomaaliya.
Madaxweynaha ayaa ugu horeyn hambalyo u direy ganacsatada iyo mas’uuliyintii suuragelisey in shirkaddan ay ka hawlgasho Soomaaliya.
“Waa markii ugu horeysey ee muddo 25 ah kadib shirkad baaxaddan leh oo dhinaca caymiska ay ka hawlgasho Soomaaliya, hambalyo ayaana idin leeyahay, waxaana idin ku boorinayaa inady adeeggiina ku baahisaan Soomaaliya oo dhan, dhab ahaantiina talaabada aad qaadeen waa mid ku dayasho mudan’’.
Madaxweynaha ayaa sidoo kale ugu baaqey shacabka inay ka faa’ideystaan adeegyada nocaan oo kale ah oo wax ka taraya db u dhiska iyo horumarinta dhaqaalaha dalka, iyadoo weliba shirkaddan ay hawlaheeda ku saleysan yihiin shareecada Islaamka.
Madaxweynayha ayaa sidoo kale ku booriyey hay’adaha dhaqaaalaha iyo waxbarashada inay xoogga saaraan sidii loo soo saari lahaa xirfadleyaal aqoontooda sareyso oo adeegyadan caymiska iyo kuwa kale ee dhaqaalaha bulshada u fidiya.
Munaasabadan waxaa kaloo ka Hadley Guddoomiyaha Gobolka Banaadir Xasan Maxamed Xuseen, Guddoomiye ku Xigeenka Bankiga Dhexe ee Soomaaliya Maryan Cabdullaahi Yuusuf iyo mas’uuliyiin ka tirsan Shirkada Caymiska Takaful.
-DHAMMAAD-
