Howlgalladan ay ciidamada booliska Soomaaliyeed iyo Maamulka Gobolka Benaadir ay ka wadaan Degmooyinka Waabari, Xamar Jajab iyo Xamar Weyne ayaa ahaa mid lagu xaqiijinayay ammaanka iyo isku xirka booliska iyo shacabka degmooyinka howlgalka laga fuliyay.
Taliyaha Hogaanka kormeerka ciidanka booliska Soomaaliyeed Jeneraal Axmed Dhayib Axmed Dhagacaleen ayaa kormeeray Degmooyinka, Waaxyaha iyo Xaafadaha degmooyinka Waaberi, Xamar Jajab iyo Xamar Weyne, waxaana uu u kuur galay wada shaqaynta booliska iyo shacabka degmooyinkaasi, isagoo warbixno ka dhagaystay saraakiisha ciidamada booliska ee howlgalka hogaaminayay.
Jeneraal Axmed Dhayib ayaa sheegay in taliska uu go’aansaday in la sameeyo howlgallo joogta ah, si looga hortago falalka ay maleegayaan dhagarqabayaasha Al Shabaab.
Jeneraalka ayaa xusay in ku-simaha Taliyaha ciidanka booliska Jeneraal Muqtaar uu amnray in saddex boqol oo ciidan oo ka tirsan ciidanka booliska loo qeybiyo degmooyinka, kuwaasi oo ay ka bilaabeen inay gaarsiiyaan ilaa iyo saddex degmo oo kala ah degmooyinka Xamar Weyne, Xamar Jajab iyo Waaberi, isagoo xusay in ciidanka ay xoojinayaan la shaqeynta maamulka iyo shacabka degmooyinka.
“Saddex boqol oo askari ayaan u qeybinay ilaa iyo saddex degmo, maantana aniga kormeer ayaan ugu imid, si aan u ogaano howsha ay hayaan, ciidamada waxa ay u xilsaaranyihiin sugidda amniga degmooyinka la geeyay, waxaana ay shaqadooda tahay isku xirka maamulka degmada iyo shacabka, maadaama ay fariisimo ka sameysteen baro cusub” ayuu yiri Jeneraal Dhago caleen.
Maxamuud Xasan Barre Guddoomiyaha Waaxda Hanti Wadaag ee Degmada Waaberi ayaa sheegay in ciidamada booliska ay shaqo wanaagsan ka qabteen Degmada Waaberi.
Maxamed Axmed Iidoow Guddoomiye ku-xigeenka Amniga iyo Siyaasadda Degmada Xamar Weyne ayaa sheegay in aad ugu farxeen dadka Xamar Weyne ciidamada howlgalka ka samaynaya Degmadooda, ayna diyaar u yihiin la shaqeynta ciidanka.
howlgalkan ayaa waxa uu soconayaa muddo saddex maalmood, waxaana looga jawaabayaa dhacdooyinkii dhowaan ka dhacday qaar ka mid ah degmooyinka Gobolka Benaadir.
