Howlgalkan oo ay si wada jir ah xaafado ka tirsan degmada Xamar Weyne ugu fuliyeen ciidanka booliska iyo kuwa Nabadgelyada Midowga Afrika ee AMISOM ayaa lagu soo qab qabtay tiro dad ah oo qaarkood looga shakisanyahay inay katirsan yihiin maleeshiyada Al-shabaab, kuwaasi oo ay ku socoto baaritaanno dheeraad ah.
Ciidamada ayaa intii ay howlgallada ku guda jireen xaafadaha degmada Xamarweyne ay guri guri u baarayeen xaafadaha, halka sidoo kale meheradaha ganacsiga baaritaanno lagu sameeyay, waxaana tirada dadka lagu soo qabtay ay gaarayaan ku dhawaad afar boqol oo qof.
Taliyaha Saldhigga Degmada Xamarweyne Gaashaanle sare Maxamed Maxamuud Garaar oo Warbaahinta la hadlay ayaa ka warbixiyay sida wada jir ah ay u fuliyeen howlgallada lagu soo qabta qabtay tiro dad ah, oo uu ku sheegay inay baaritaanno ku sameeyaan.
Guddoomiyaha Degmada Xamar weyne Cabdiqaadir Maxamed Cabdiqaadir oo isna lahadlay Warbaahinta ayaa sheegay in howlgalladan looga golleeyahay xaqiijinta degmada, isagoo shacabka ka codsaday inay ciidanka amniga gacan ku siiyaan xoojinta amniga iyo ka hortagga falalka ka dhanka ah amniga.
Dhanka kale howlgallo kuwan la mid ah oo lagu xaqiijinayay amniga xaafadaha degmada Warta Nabadda ayaa laga sameeyay xaafadaha degmadaasi, kuwaasi oo lagu soo qab qabtay tiro dad ah oo looga shakisanyahay inay ka tirsanyihiin maleeshiyada Al-Shabaab.
Saraakiisha amniga ee howlgalka hogaamineysay ayaa sheegay in ay wadaan baaritaanno lagu kala saarayo dadkii howlgalka lagu soo qabtay.
