Agaasimaha Guud ee Wasaaradda Amniga Gudaha Xukuumadda Federaalka Soomaaliya mudane Yusuf Cali ayaa maanta magaalada Muqdisho ugu soo xiray howl wadeeno ka tirsan Wasaaradda amniga iyo Ciidanka Booliiska aqoon is-weydaarsi socday muddo sedex cisho ah oo ku saabsanaa kor u qaadista bay’ad ilaalineysa carruurta ay saameeyeen colaadaha hubeysan.
Aqoon is-weydaarsiga oo ay iska kaashadeen Wasaaradda Amniga Soomaaliya iyo hay’adda Qaramada Midoobay u qaabilsan arrimaha carruurta ee UNICEF ayaa xubnihii ka qeyb galay waxay yeesheen doodo ku saabsan badqabka carruurta, iyagoo tallooyin kasoo jeediyay madasha.
Agaasime Yusuf Cali ayaa sheegay in Wasaaradda Amniga gudaha ay waajibaad xoogan ka saaranyahay badqabka carruurta iyo ka hortagga in loo adeegsado colaadaha, isagoo hay’adda UNICEF uga mahadceliyay iskaashiga ay la leedahay Wasaaradda, kaas oo ku saabsan ilaalinta carruurta.
Ugu dambeyn Agaasimaha guud ee Wasaaradda amniga mudane Yusuf Cali ayaa howl wadeennada ka faa’iideystay aqoon is-weydaarsiga ku bogaadiyay dadaalkooda, isagoo ka rajeeyay iney dalka uga faa’ideeyaan waxa ay barteen.
