Isbitaalka degmada Beledweyne ayaa laga hirgaliyay mashruuc koronto looga dhalinayo cadceedda, taas oo suurta galin doonto in loo adeegsado dhammaan qeybaha uu ka kooban yahay isbitaalku.
Madaxa mashaariicda ee gobolka Hiiraan Axmed Cabdalla Inji ayaa Radio Muqdisho u sheegay in si loo xalliyo dhibaato xagga korontada ah oo heysatay isbitaalka guud ee magaalada, la hirgaliyay mashruuc Soollaro looga dhalinayo korontada loo isticmaali lahaa Isbitaalka.
Hay’ad Jarmal ah ayuu sheegay inay fulinayso mashruucaan oo suurta galin doono in isbitaalku uusan koronto la’aan u xayirmin, taas oo keeni doonta in howsha isbitaalku ay noqoto mid joogto ah.
“Waxaan helnay soolarro kaafinaya isbitaalka 24-ka saac, sida qeybaha saallada, raajada, qolalka bukaannadu jiifaan, qeybta raashinka iyo dhammaan qeybaha kale” ayuu yiri Axmed Inji.
Muddooyinkii la soo dhaafay waxaa isbitaalka heysatay cillad dhinaca korontada ah, ayadoo ay dhici jirtay in korontadu ay tagto ayadoo bukaano loo adeegayo. Mashruucaan ayaa meesha ka saari doona caqabadahaasi.
